baaten na kare kyon dil-e-nashad tumhaari

bāteñ na kare kyoñ dil-e-nāshād tumhārī

har vaqt satātī hai ise yaad tumhārī

kuchh muñh se nahīñ kahte haiñ ham 'ishq ke maare

ḳhāmosh sahā karte haiñ bedād tumhārī

āñkhoñ meñ bhare kis ke haiñ aañsū ye batāo

fariyād hamārī hai ki fariyād tumhārī

ham to ye samajhte haiñ ki tum mil bhī ga.e to

bechain hī rakkhegī hameñ yaad tumhārī

har rang mubārak rahe har tarh mubārak

ġhairoñ ko karam aur hameñ bedād tumhārī

so jaa.e baḌe chain se bīmār-e-shab-e-ġham

rātoñ ko na aa jaa.e agar yaad tumhārī

ye chiiz bhī mumkin hai ki ham bhuul bhī jaa.eñ

ab tak to hameñ yaad hai bedād tumhārī

ro dete ho tum sun ke kisī naam ko aksar

'ādat nahīñ jaatī hai ye 'bahzād' tumhārī

baaten na kare kyon dil-e-nashad tumhaari

har waqt satati hai ise yaad tumhaari

kuchh munh se nahin kahte hain hum 'ishq ke mare

KHamosh saha karte hain bedad tumhaari

aankhon mein bhare kis ke hain aansu ye batao

fariyaad hamari hai ki fariyaad tumhaari

hum to ye samajhte hain ki tum mil bhi gae to

bechain hi rakkhegi hamein yaad tumhaari

har rang mubarak rahe har tarh mubarak

ghairon ko karam aur hamein bedad tumhaari

so jae baDe chain se bimar-e-shab-e-gham

raaton ko na aa jae agar yaad tumhaari

ye chiz bhi mumkin hai ki hum bhul bhi jaen

ab tak to hamein yaad hai bedad tumhaari

ro dete ho tum sun ke kisi nam ko aksar

'adat nahin jati hai ye 'bahzad' tumhaari