باتیں نہ کرے کیوں دل ناشاد تمہاری

باتیں نہ کرے کیوں دل ناشاد تمہاری

ہر وقت ستاتی ہے اسے یاد تمہاری

کچھ منہ سے نہیں کہتے ہیں ہم عشق کے مارے

خاموش سہا کرتے ہیں بیداد تمہاری

آنکھوں میں بھرے کس کے ہیں آنسو یہ بتاؤ

فریاد ہماری ہے کہ فریاد تمہاری

ہم تو یہ سمجھتے ہیں کہ تم مل بھی گئے تو

بے چین ہی رکھے گی ہمیں یاد تمہاری

ہر رنگ مبارک رہے ہر طرح مبارک

غیروں کو کرم اور ہمیں بیداد تمہاری

سو جائے بڑے چین سے بیمار شب غم

راتوں کو نہ آ جائے اگر یاد تمہاری

یہ چیز بھی ممکن ہے کہ ہم بھول بھی جائیں

اب تک تو ہمیں یاد ہے بیداد تمہاری

رو دیتے ہو تم سن کے کسی نام کو اکثر

عادت نہیں جاتی ہے یہ بہزادؔ تمہاری