baatil hai humse dawa shaer ko ham-sari ka

bātil hai ham se da.avā shā.er ko ham-sarī kā

dīvān hai hamārā kiisa javāharī kā

chehra tirā sā kab hai sultān-e-ḳhāvarī kā

chīra hazār bāñdhe sar par jo vo zarī kā

muñh par ye goshvāra motī kā jalva-gar hai

jaise qirān-e-bāham ho maah o mushtarī kā

ā.īna-ḳhāne meñ vo jis vaqt aan baiThe

phir jis taraf ko dekho jalva hai vaañ parī kā

juz shauq-e-dil na pahuñchūñ hargiz ba-kū-e-jānāñ

ai ḳhizr kab huuñ terī muhtāj rahbarī kā

jo dekhtā hai tujh ko hañstā hai qahqahe maar

ai shaiḳh terā chehra mabdā hai masḳharī kā

tālib haiñ sīm-o-zar ke ḳhūbān-e-hind 'saudā'

ahvāl kaun samjhe āshiq kī be-zarī kā

baatil hai hum se dawa shaer ko ham-sari ka

diwan hai hamara kisa jawahari ka

chehra tera sa kab hai sultan-e-KHawari ka

chira hazar bandhe sar par jo wo zari ka

munh par ye goshwara moti ka jalwa-gar hai

jaise qiran-e-baham ho mah o mushtari ka

aaina-KHane mein wo jis waqt aan baiThe

phir jis taraf ko dekho jalwa hai wan pari ka

juz shauq-e-dil na pahunchun hargiz ba-ku-e-jaanan

ai KHizr kab hun teri muhtaj rahbari ka

jo dekhta hai tujh ko hansta hai qahqahe mar

ai shaiKH tera chehra mabda hai masKHari ka

talib hain sim-o-zar ke KHuban-e-hind 'sauda'

ahwal kaun samjhe aashiq ki be-zari ka