badan ka ramz samajh ruh ka ishaara samajh

badan kā ramz samajh ruuh kā ishāra samajh

mujhe samajh na samajh dukh mirā ḳhudārā samajh

tujhe ham aur kisī kā na hone deñge kabhī

tū bhā gayā hai hameñ ḳhud ko ab hamārā samajh

jo tīrgī meñ tujhe kuchh dikhā.ī detā nahīñ

samajh meñ aa.e to is ko bhī ik nazāra samajh

nahīñ to vaqt hī samjhā.egā tujhe ik din

maiñ chāhtā huuñ mirī baat ko dobāra samajh

ki maiñ to apne bhī kuchh kaam aa nahīñ paayā

tujhe ye kis ne kahā thā mujhe sahārā samajh

ye kār-gāh-e-tilismāt hai yahāñ 'sayyad'

ḳhasāra naf.a samajh naf.a ko ḳhasāra samajh

badan ka ramz samajh ruh ka ishaara samajh

mujhe samajh na samajh dukh mera KHudara samajh

tujhe hum aur kisi ka na hone denge kabhi

tu bha gaya hai hamein KHud ko ab hamara samajh

jo tirgi mein tujhe kuchh dikhai deta nahin

samajh mein aae to is ko bhi ek nazara samajh

nahin to waqt hi samjhaega tujhe ek din

main chahta hun meri baat ko dobara samajh

ki main to apne bhi kuchh kaam aa nahin paya

tujhe ye kis ne kaha tha mujhe sahaara samajh

ye kar-gah-e-tilismat hai yahan 'sayyad'

KHasara nafa samajh nafa ko KHasara samajh