bahaar aai hai aalam mein ajab wahshat ka saman hai

bahār aa.ī hai aalam meñ ajab vahshat kā sāmāñ hai

bayābāñ meñ kabhī ghar hai kabhī ghar meñ bayābāñ hai

mirī pābandiyāñ hī jab mirī āzādiyāñ Thahrīñ

to gulshan ho ki sahrā sab mirī nazroñ meñ zindāñ hai

har ik sarmast-e-irfāñ hai magar hai farq bas itnā

kahīñ dariyā meñ qatra hai kahīñ qatre meñ tūfāñ hai

chaman meñ phuul haiñ phūloñ pe kuchh bikhre hue tinke

mirā ujḌā nasheman bhī gulistāñ-dar-gulistāñ hai

samajh meñ kuchh nahīñ aatā duā kis chiiz kī māñgūñ

kabhī jiine kī ḳhvāhish hai kabhī marne kā armāñ hai

kahāñ kā qissa hai āḳhir ye dil meñ kyā samā.ī hai

palaT jaao palaT jaao idhar gor-e-ġharībāñ hai

na chhoḌā farq kuchh vahshat ne mere jeb-o-dāmāñ meñ

garebāñ hai jo dāman hai jo dāman hai garebāñ hai

rukī hai lab pe jaañ aakar pe ab to maut bhī 'ālī'

ajab kuchh kashmakash meñ hai na mushkil hai na āsāñ hai

bahaar aai hai aalam mein ajab wahshat ka saman hai

bayaban mein kabhi ghar hai kabhi ghar mein bayaban hai

meri pabandiyan hi jab meri aazadiyan Thahrin

to gulshan ho ki sahra sab meri nazron mein zindan hai

har ek sarmast-e-irfan hai magar hai farq bas itna

kahin dariya mein qatra hai kahin qatre mein tufan hai

chaman mein phul hain phulon pe kuchh bikhre hue tinke

mera ujDa nasheman bhi gulistan-dar-gulistan hai

samajh mein kuchh nahin aata dua kis chiz ki mangun

kabhi jine ki KHwahish hai kabhi marne ka arman hai

kahan ka qissa hai aaKHir ye dil mein kya samai hai

palaT jao palaT jao idhar gor-e-ghariban hai

na chhoDa farq kuchh wahshat ne mere jeb-o-daman mein

gareban hai jo daman hai jo daman hai gareban hai

ruki hai lab pe jaan aakar pe ab to maut bhi 'ali'

ajab kuchh kashmakash mein hai na mushkil hai na aasan hai