bahaar-e-gulshan-e-ayyam hun main

bahār-e-gulshan-e-ayyām huuñ maiñ

sahar nuur o savād-e-shām huuñ maiñ

shitāb aa ai mah-e-īsā-nafas tū

ki ḳhurshīd-e-kanār-e-bām huuñ maiñ

agar manzūr hai aanā to jald aa

ki tujh bin saḳht be-ārām huuñ maiñ

bajā.e mai tirī duurī meñ ai gul

ba-rañg-e-lāla ḳhūñ-āshām huuñ maiñ

muhibb-o-muḳhlis o fidvī huuñ terā

samajh tū lā.eq-e-dushnām huuñ maiñ

tujhe dekh aap meñ rahtā nahīñ maiñ

ġharaz tujh vasl se nākām huuñ maiñ

bahār aa.ī chaman meñ go mujhe kyā

giraftār o asīr-e-dām huuñ maiñ

nishāñ apnā kahīñ paayā nahīñ yaañ

faqat anqā-sifat yak naam huuñ maiñ

na paiġhām o salām o ne mulāqāt

abas tujh ishq meñ bad-nām huuñ maiñ

na huuñ parvāna-e-har-sham.a 'bedār'

fidā-e-sarv-e-gul-andām huuñ maiñ

bahaar-e-gulshan-e-ayyam hun main

sahar nur o sawad-e-sham hun main

shitab aa ai mah-e-isa-nafas tu

ki KHurshid-e-kanar-e-baam hun main

agar manzur hai aana to jald aa

ki tujh bin saKHt be-aram hun main

bajae mai teri duri mein ai gul

ba-rang-e-lala KHun-asham hun main

muhibb-o-muKHlis o fidwi hun tera

samajh tu laeq-e-dushnam hun main

tujhe dekh aap mein rahta nahin main

gharaz tujh wasl se nakaam hun main

bahaar aai chaman mein go mujhe kya

giraftar o asir-e-dam hun main

nishan apna kahin paya nahin yan

faqat anqa-sifat yak nam hun main

na paigham o salam o ne mulaqat

abas tujh ishq mein bad-nam hun main

na hun parwana-e-har-shama 'bedar'

fida-e-sarw-e-gul-andam hun main