bahaar ka rup bhi nigahon mein ek fareb-e-bahaar sa hai

bahār kā ruup bhī nigāhoñ meñ ik fareb-e-bahār sā hai

hayāt meñ dilkashī nahīñ hai hayāt meñ intishār sā hai

zamāna kyā dekhiye dikhā.e na jaane kyā inqalāb aa.e

falak ke tevar meñ ḳhashmagīñ se zamīñ ke dil meñ ġhubār sā hai

kamāl-e-dīvāngī to jab hai rahe na ehsās-e-jaib-o-dāman

agar hai ehsās-e-jaib-o-dāman to phir junūñ hoshiyār sā hai

kuchh aaj aisī hī jī pe guzrī dabī huī thī jo choT ubhrī

jise sambhāle huā thā dil meñ vo naala be-iḳhtiyār sā hai

abhī umīd-o-vafā na toḌo siyāsat-e-dilbarī na chhoḌo

kabhī jo firdaus-e-rañg-o-bū thā vo ek ujḌā dayār sā hai

'nihāl' ko be piye hai mastī hai muft ilzām-e-mai-parastī

hai aam is shahr meñ rivāyat ye shaḳhs kuchh bāda-ḳhvār sā hai

bahaar ka rup bhi nigahon mein ek fareb-e-bahaar sa hai

hayat mein dilkashi nahin hai hayat mein intishaar sa hai

zamana kya dekhiye dikhae na jaane kya inqalab aae

falak ke tewar mein KHashmagin se zamin ke dil mein ghubar sa hai

kamal-e-diwangi to jab hai rahe na ehsas-e-jaib-o-daman

agar hai ehsas-e-jaib-o-daman to phir junun hoshiyar sa hai

kuchh aaj aisi hi ji pe guzri dabi hui thi jo choT ubhri

jise sambhaale hua tha dil mein wo nala be-iKHtiyar sa hai

abhi umid-o-wafa na toDo siyasat-e-dilbari na chhoDo

kabhi jo firdaus-e-rang-o-bu tha wo ek ujDa dayar sa hai

'nihaal' ko be piye hai masti hai muft ilzam-e-mai-parasti

hai aam is shahr mein riwayat ye shaKHs kuchh baada-KHwar sa hai