bahne lage to palkon se laf kar diya gaya

bahne lage to palkoñ se laf kar diyā gayā

phir āñsuoñ ko durr-e-najaf kar diyā gayā

kuchh qahqahoñ kī guuñj falak tak sunā.ī dī

kuchh siskiyoñ ko tābe'-e-daf kar diyā gayā

jin uñgliyoñ ke zaḳhm abhī tak nahīñ bhare

tārīḳh se unhī ko hazaf kar diyā gayā

dasht-e-badan kī pyaas bujhānī thī is liye

ashkoñ ke ruḳh ko dil kī taraf kar diyā gayā

ġharqāb log jab na samundar pahuñch sake

tuġhyāniyoñ ko lāsh-ba-kaf kar diyā gayā

utrā javān aañkh meñ jaise hī motiyā

āñkhoñ kī putliyoñ ko sadaf kar diyā gayā

'be-dil' mahāz-e-jang se lauTe jo lashkarī

saarī safoñ ko ek hī saf kar diyā gayā

bahne lage to palkon se laf kar diya gaya

phir aansuon ko durr-e-najaf kar diya gaya

kuchh qahqahon ki gunj falak tak sunai di

kuchh siskiyon ko tabe'-e-daf kar diya gaya

jin ungliyon ke zaKHm abhi tak nahin bhare

tariKH se unhi ko hazaf kar diya gaya

dasht-e-badan ki pyas bujhani thi is liye

ashkon ke ruKH ko dil ki taraf kar diya gaya

gharqab log jab na samundar pahunch sake

tughyaniyon ko lash-ba-kaf kar diya gaya

utra jawan aankh mein jaise hi motiya

aankhon ki putliyon ko sadaf kar diya gaya

'be-dil' mahaz-e-jang se lauTe jo lashkari

sari safon ko ek hi saf kar diya gaya