bahut se zaKHm jinko mustaqil mehman rakkha hai

bahut se zaḳhm jin ko mustaqil mehmān rakkhā hai

badan kī qaid meñ kuchh dard kā sāmān rakkhā hai

kabhī lagtā hai ki maiñ āsmāñ ko chhū ke aa.ī huuñ

kabhī lagtā hai raste meñ koī tūfān rakhā hai

har ik lamha gumāñ kī dastaras meñ kyā batā.eñ ham

kahāñ ummīd rakkhī hai kahāñ īmān rakkhā hai

tumhārī aañkh meñ Thahrā huā paanī batātā hai

mohabbat kī thī tum ne aur us kā maan rakkhā hai

mire aabā ke ghar ko bech kar mujh se vo kahtā hai

vahīñ kamra paḌā hai aur vahīñ dālān rakkhā hai

hamārī himmatoñ kī daad de kar lauT jā.egā

hamāre sāmne jis ġham ne siina taan rakkhā hai

bahut se zaKHm jin ko mustaqil mehman rakkha hai

badan ki qaid mein kuchh dard ka saman rakkha hai

kabhi lagta hai ki main aasman ko chhu ke aai hun

kabhi lagta hai raste mein koi tufan rakha hai

har ek lamha guman ki dastaras mein kya bataen hum

kahan ummid rakkhi hai kahan iman rakkha hai

tumhaari aankh mein Thahra hua pani batata hai

mohabbat ki thi tum ne aur us ka man rakkha hai

mere aaba ke ghar ko bech kar mujh se wo kahta hai

wahin kamra paDa hai aur wahin dalan rakkha hai

hamari himmaton ki dad de kar lauT jaega

hamare samne jis gham ne sina tan rakkha hai