baiTha hun waqf-e-matam-e-hasti miTa hua

baiThā huuñ vaqf-e-mātam-e-hastī miTā huā

zahr-e-vafā hai ghar kī fazā meñ ghulā huā

ḳhud us ke paas jā.ūñ na us ko bulā.ūñ paas

paayā hai vo mizāj ki jiinā balā huā

us par ġhalat hai ishq meñ ilzām-e-dushmanī

qātil hai mere hajlā-e-jāñ meñ chhupā huā

haiñ jism-o-jāñ baham ye magar kis ko hai ḳhabar

kis kis jagah se dāman-e-dil hai silā huā

hai rāhvār-e-shauq pe āseb-e-be-dilī

rakkhā hai kab se sāmne sāġhar bharā huā

hāsil hai jis ko 'arsh' fazāoñ meñ iḳhtiyār

vo dil ke saath khel rahā hai to kyā huā

baiTha hun waqf-e-matam-e-hasti miTa hua

zahr-e-wafa hai ghar ki faza mein ghula hua

KHud us ke pas jaun na us ko bulaun pas

paya hai wo mizaj ki jina bala hua

us par ghalat hai ishq mein ilzam-e-dushmani

qatil hai mere hajla-e-jaan mein chhupa hua

hain jism-o-jaan baham ye magar kis ko hai KHabar

kis kis jagah se daman-e-dil hai sila hua

hai rahwar-e-shauq pe aaseb-e-be-dili

rakkha hai kab se samne saghar bhara hua

hasil hai jis ko 'arsh' fazaon mein iKHtiyar

wo dil ke sath khel raha hai to kya hua