baḳht-bargashta haiñ aise jo havas kar dekheñ
ḳhaak haath aa.e agar ḳhvāb meñ bhī zar dekheñ
bad-nasībī yahī kahtī hai jahāñ zar dekheñ
idhar aa.iye aap aur koī ghar dekheñ
har-nafas kuuch hai āñkhoñ meñ hai dam misl-e-habāb
hashr par va.ada-e-dīdār hai kyūñkar dekheñ
ham vo mai-ḳhvār haiñ juz bāda-kashī raah na de
istiḳhāra bhī agar tauba-e-mai par dekheñ
putliyāñ be-ajal āñkhoñ kī mirī phir jaa.eñ
mardum-e-chashm ko de kar jo vo chakkar dekheñ
dekhnā hai jo unheñ merī siyah-kārī-e-dil
kisī shīshe meñ siyāhī ko kaho bhar dekheñ
be-qarāroñ meñ vo bekas haiñ ki ro.e na koī
ham taḌap kar bhī jo paare kī tarah mar dekheñ
sāda-rūyoñ se ye qaul-e-dil-e-be-ishq hai 'shād'
aap ai ā.ina-rū aur koī ghar dekheñ
baKHt-bargashta hain aise jo hawas kar dekhen
KHak hath aae agar KHwab mein bhi zar dekhen
bad-nasibi yahi kahti hai jahan zar dekhen
idhar aaiye aap aur koi ghar dekhen
har-nafas kuch hai aankhon mein hai dam misl-e-habab
hashr par wada-e-didar hai kyunkar dekhen
hum wo mai-KHwar hain juz baada-kashi rah na de
istiKHara bhi agar tauba-e-mai par dekhen
putliyan be-ajal aankhon ki meri phir jaen
mardum-e-chashm ko de kar jo wo chakkar dekhen
dekhna hai jo unhen meri siyah-kari-e-dil
kisi shishe mein siyahi ko kaho bhar dekhen
be-qararon mein wo bekas hain ki roe na koi
hum taDap kar bhi jo pare ki tarah mar dekhen
sada-ruyon se ye qaul-e-dil-e-be-ishq hai 'shad'
aap ai aaina-ru aur koi ghar dekhen
Source:
Sukhan-e-Bemisal: Deewan-e-Shad (pdf) and website (Pg. p-72 e-78 pdf-79)
-
Author:
Shad Lakhnavi
-
- Edition: 1901
- Publisher: Matbaa Tasweer-e- Alam, Lucknow
- Year of Publication: 1901
Additional information available
Click on the INTERESTING button to view additional information associated with this sher.
rare Unpublished content
This ghazal contains ashaar not published in the public domain. These are marked by a red line on the left.