ban-sanwar kar ho jo wo jalwa-numa koThe par

ban-sañvar kar ho jo vo jalva-numā koThe par

charḳh-e-chārum kā nazar aa.e samā koThe par

tasht-az-bām na karnā kahīñ rāz-e-ulfat

na ishāre karo ai shoḳh-adā koThe par

Dore Dāleñ na kahīñ yaar uḌāne vaale

be-takalluf na yuuñ kankavve uḌā koThe par

sab ko mahtāb kā dhokā huā mahtābī par

kal sar-e-shām vo mah-rū jo chaḌhā koThe par

vo kahā karte haiñ koThoñ chaḌhī hoñToñ niklī

dil meñ hī rakhnā jo kal raat huā koThe par

chāñdnī ho bichhī aur chāñd ne ho khet kiyā

aur pahlū meñ ho vo mah-laqā koThe par

āftāb-e-lab-e-bām ab to hue haiñ 'kaifī'

āñkheñ phir us se laḌā.eñ bhalā kyā koThe par

ban-sanwar kar ho jo wo jalwa-numa koThe par

charKH-e-chaarum ka nazar aae sama koThe par

tasht-az-baam na karna kahin raaz-e-ulfat

na ishaare karo ai shoKH-ada koThe par

Dore Dalen na kahin yar uDane wale

be-takalluf na yun kankawwe uDa koThe par

sab ko mahtab ka dhoka hua mahtabi par

kal sar-e-sham wo mah-ru jo chaDha koThe par

wo kaha karte hain koThon chaDhi honTon nikli

dil mein hi rakhna jo kal raat hua koThe par

chandni ho bichhi aur chand ne ho khet kiya

aur pahlu mein ho wo mah-laqa koThe par

aaftab-e-lab-e-baam ab to hue hain 'kaifi'

aankhen phir us se laDaen bhala kya koThe par