band honTon se bhi izhaar-e-tamanna karte

band hoñToñ se bhī iz.hār-e-tamannā karte

aa.ina ban ke tire husn ko dekhā karte

apnā saaya bhī yahāñ ġhair nazar aatā hai

ajnabī shahr meñ ham kis pe bharosa karte

us kī mahfil meñ to ik bhiiḌ thī dīvānoñ kī

pahle dil ahl-e-nazar ahl-e-vafā kyā karte

ishq har haal meñ pāband-e-vafā hotā hai

ham to badnām the kyuuñ aap ko rusvā karte

itnī guzrī hai jahāñ aur guzar jā.egī

zindagī ke liye itnā nahīñ sochā karte

jab talak saañs chale bas yuuñ hī chalte rahiye

chal ke do-chār qadam yuuñ nahīñ Thahrā karte

ai ḳhudā ham tirī vahdat pe yaqīñ rakhte haiñ

kyuuñ tire dar ke sivā ham kahīñ sajda karte

band honTon se bhi izhaar-e-tamanna karte

aaina ban ke tere husn ko dekha karte

apna saya bhi yahan ghair nazar aata hai

ajnabi shahr mein hum kis pe bharosa karte

us ki mahfil mein to ek bhiD thi diwanon ki

pahle dil ahl-e-nazar ahl-e-wafa kya karte

ishq har haal mein paband-e-wafa hota hai

hum to badnam the kyun aap ko ruswa karte

itni guzri hai jahan aur guzar jaegi

zindagi ke liye itna nahin socha karte

jab talak sans chale bas yun hi chalte rahiye

chal ke do-chaar qadam yun nahin Thahra karte

ai KHuda hum teri wahdat pe yaqin rakhte hain

kyun tere dar ke siwa hum kahin sajda karte