barae nam sahi hasil-e-talab Thahra

barā.e naam sahī hāsil-e-talab Thahrā

vo ek lamha jo sarmāya-e-tarab Thahrā

khule saroñ pe ghanī chhāñv le ke aayā thā

hamāre paas vo abr-e-ravāñ bhī kab Thahrā

naqīb-e-amn rahā maiñ mahāz-e-jañg pe bhī

yahī usuul mirī fatah kā sabab Thahrā

kiyā thā jis ko kabhī tere naam se mansūb

vahī sahīfa to sarmāya-e-adab Thahrā

vahī mire liye vaj.h-e-nashāt-e-rūh thā 'nāz'

vo ik tabassum-e-rañgīñ jo zer-e-lab Thahrā

barae nam sahi hasil-e-talab Thahra

wo ek lamha jo sarmaya-e-tarab Thahra

khule saron pe ghani chhanw le ke aaya tha

hamare pas wo abr-e-rawan bhi kab Thahra

naqib-e-amn raha main mahaz-e-jang pe bhi

yahi usul meri fatah ka sabab Thahra

kiya tha jis ko kabhi tere nam se mansub

wahi sahifa to sarmaya-e-adab Thahra

wahi mere liye wajh-e-nashat-e-ruh tha 'naz'

wo ek tabassum-e-rangin jo zer-e-lab Thahra