barq mera aashiyan kab ka jala kar le gai

barq merā āshiyāñ kab kā jalā kar le ga.ī

kuchh jo ḳhākistar bachā āñdhī uḌā kar le ga.ī

us ke qadmoñ tak na betābī baḌhā kar le ga.ī

haa.e do palTe diye aur phir haTā kar le ga.ī

nā-tavānī ham ko hāthoñ haath uThā kar le ga.ī

chyūñTī se chyūñTī daana chhuḌā kar le ga.ī

sub.h-e-ruḳh se kaun shām-e-zulf meñ jaatā thā aah

ai dil-e-shāmat-zada shāmat lagā kar le ga.ī

ḳhuun se farhād ke rañgīñ huā dāmān-e-koh

kyuuñ na mauj-e-shīr ye dhabbā chhuḌā kar le ga.ī

tum ne to chhoḌā hī thā ai hamrahān-e-qāfila

lekin āvāz-e-jaras ham ko jagā kar le ga.ī

nok-e-mizhgāñ jab huī sīna-fagāroñ se do-chār

pāra-hā-e-dil se gul-dasta banā kar le ga.ī

dekhī kuchh dil kī kashish lailā ki naaqe ko tire

sū-e-majnūñ āḳhirash rasta bhulā kar le ga.ī

vaah ai soz-e-darūñ kūche meñ us ke barq-e-āh

raat ham ko har qadam mish.al dikhā kar le ga.ī

vo ga.e ghar ġhair ke aur yaañ hameñ dam bhar ke baad

bad-gumānī un ke ghar sū ghar phirā kar le ga.ī

jo shahīd-e-nāz kūche meñ tumhāre thā paḌā

kyā kahūñ taqdīr use kyūñkar uThā kar le ga.ī

dasht-e-vahshat meñ bagūlā thā ki dīvāna tirā

rūh-e-majnūñ bahr-e-istiqbāl aa kar le ga.ī

aag meñ hai kaun gir paḌtā magar parvāne ko

ātish-e-soz-e-mohabbat thī jalā kar le ga.ī

ai parī pahlū se mere kyā kahūñ terī nigāh

dil uḌā kar le ga.ī yā par lagā kar le ga.ī

'zauq' mar jaane kā to apne koī mauqā na thā

kū-e-jānāñ meñ ajal nāhaq lagā kar le ga.ī

barq mera aashiyan kab ka jala kar le gai

kuchh jo KHakistar bacha aandhi uDa kar le gai

us ke qadmon tak na betabi baDha kar le gai

hae do palTe diye aur phir haTa kar le gai

na-tawani hum ko hathon hath uTha kar le gai

chyunTi se chyunTi dana chhuDa kar le gai

subh-e-ruKH se kaun sham-e-zulf mein jata tha aah

ai dil-e-shamat-zada shamat laga kar le gai

KHun se farhad ke rangin hua daman-e-koh

kyun na mauj-e-shir ye dhabba chhuDa kar le gai

tum ne to chhoDa hi tha ai hamrahan-e-qafila

lekin aawaz-e-jaras hum ko jaga kar le gai

nok-e-mizhgan jab hui sina-fagaron se do-chaar

para-ha-e-dil se gul-dasta bana kar le gai

dekhi kuchh dil ki kashish laila ki naqe ko tere

su-e-majnun aaKHirash rasta bhula kar le gai

wah ai soz-e-darun kuche mein us ke barq-e-ah

raat hum ko har qadam mishal dikha kar le gai

wo gae ghar ghair ke aur yan hamein dam bhar ke baad

bad-gumani un ke ghar su ghar phira kar le gai

jo shahid-e-naz kuche mein tumhaare tha paDa

kya kahun taqdir use kyunkar uTha kar le gai

dasht-e-wahshat mein bagula tha ki diwana tera

ruh-e-majnun bahr-e-istiqbaal aa kar le gai

aag mein hai kaun gir paDta magar parwane ko

aatish-e-soz-e-mohabbat thi jala kar le gai

ai pari pahlu se mere kya kahun teri nigah

dil uDa kar le gai ya par laga kar le gai

'zauq' mar jaane ka to apne koi mauqa na tha

ku-e-jaanan mein ajal nahaq laga kar le gai