bas ek bar falak se ishaara ho jae

bas ek baar falak se ishāra ho jaa.e

phir us ke ba.ad bhale jo ḳhasāra ho jaa.e

ajab fazā hai ki tahqīq us pe hai mauqūf

jo ho chukā hai vo ham se dobāra ho jaa.e

hatheliyoñ se halaq meñ utartā jām-e-visāl

kisī gilās meñ Dāleñ to khārā ho jaa.e

bas itnā duur rahūñgā ki tujh ko dekh sakūñ

kuchh itnā duur ki merā guzāra ho jaa.e

ye jitnī raushnī sadiyoñ meñ jazb kar chukī hai

zamīn chāñd ko le kar sitāra ho jaa.e

ajab nahīñ koī tujh sā banā diyā jaa.e

ajab nahīñ hai ki tū aur pyārā ho jaa.e

ye tāqchoñ meñ rakhe sab charāġh sūraj haiñ

agar vo chāñd sā chehra hamārā ho jaa.e

bas ek bar falak se ishaara ho jae

phir us ke baad bhale jo KHasara ho jae

ajab faza hai ki tahqiq us pe hai mauquf

jo ho chuka hai wo hum se dobara ho jae

hatheliyon se halaq mein utarta jam-e-visal

kisi gilas mein Dalen to khaara ho jae

bas itna dur rahunga ki tujh ko dekh sakun

kuchh itna dur ki mera guzara ho jae

ye jitni raushni sadiyon mein jazb kar chuki hai

zamin chand ko le kar sitara ho jae

ajab nahin koi tujh sa bana diya jae

ajab nahin hai ki tu aur pyara ho jae

ye taqchon mein rakhe sab charagh suraj hain

agar wo chand sa chehra hamara ho jae