bas yunhi aankhen ashk-awar hain

bas yūñhī āñkheñ ashk-āvar haiñ

varna ham kaun se samundar haiñ

merī ġhazleñ sabhī tumhī par haiñ

saare paikar tumhāre paikar haiñ

morcha-band hai sipāh-e-'adū

aur ham damdamoñ se bāhar haiñ

ḳhushk-sālī kā saal thā pichhlā

aur is saal bārisheñ sar haiñ

kyā karoge mazīd nahlā kar

ham to pahle hī ḳhuun meñ tar haiñ

ham se ummīd-e-rahbarī mat rakh

ham munāfiq sadī ke rahbar haiñ

'be-dil' ab un ko kyā kahā jaa.e

apnī auqāt se jo bāhar haiñ

bas yunhi aankhen ashk-awar hain

warna hum kaun se samundar hain

meri ghazlen sabhi tumhi par hain

sare paikar tumhaare paikar hain

morcha-band hai sipah-e-'adu

aur hum damdamon se bahar hain

KHushk-sali ka sal tha pichhla

aur is sal barishen sar hain

kya karoge mazid nahla kar

hum to pahle hi KHun mein tar hain

hum se ummid-e-rahbari mat rakh

hum munafiq sadi ke rahbar hain

'be-dil' ab un ko kya kaha jae

apni auqat se jo bahar hain