basi hui hai ye kaisi KHushbu mujh mein

basī huī hai ye kaisī ḳhushbū mujh meñ

shāyad aa kar baiTh gayā hai tū mujh meñ

zulmat meñ ye nuur kahāñ se phailā hai

bol rahā hai kaun ye allah-hū mujh meñ

terī talab meñ jān-e-tamannā har shab kyoñ

jalte-bujhte rahte haiñ jugnū mujh meñ

dil pāgal kyoñ naach rahā hai sochtā huuñ

TuuT rahe haiñ ye kaise ghuñghrū mujh meñ

tum merī tā'rīf ke pul kyoñ bāñdhte ho

nikleñge taz.hīk ke bhī pahlū mujh meñ

ġham meñ kisī ke āñkheñ bahtī rahtī haiñ

jazb kahāñ ho paate haiñ aañsū mujh meñ

jaan liyā hai maiñ ne har shai faanī hai

ai duniyā phir kyoñ ho terī ḳhū mujh meñ

shā'ir huuñ kyā airā-ġhairā samjhā hai

DhūñD rahe ho kyoñ natthū-ḳhairū mujh meñ

'shams' maiñ ḳhud ye raaz na ab tak jaan sakā

maiñ urdu meñ zam huuñ yā urdu mujh meñ

basi hui hai ye kaisi KHushbu mujh mein

shayad aa kar baiTh gaya hai tu mujh mein

zulmat mein ye nur kahan se phaila hai

bol raha hai kaun ye allah-hu mujh mein

teri talab mein jaan-e-tamanna har shab kyon

jalte-bujhte rahte hain jugnu mujh mein

dil pagal kyon nach raha hai sochta hun

TuT rahe hain ye kaise ghunghru mujh mein

tum meri ta'rif ke pul kyon bandhte ho

niklenge tazhik ke bhi pahlu mujh mein

gham mein kisi ke aankhen bahti rahti hain

jazb kahan ho pate hain aansu mujh mein

jaan liya hai main ne har shai fani hai

ai duniya phir kyon ho teri KHu mujh mein

sha'ir hun kya aira-ghaira samjha hai

DhunD rahe ho kyon natthu-KHairu mujh mein

'shams' main KHud ye raaz na ab tak jaan saka

main urdu mein zam hun ya urdu mujh mein