bastiyan DhunDh rahi hain unhen viranon mein

bastiyāñ DhūñDh rahī haiñ unheñ vīrānoñ meñ

vahshateñ baḌh ga.iiñ had se tire dīvānoñ meñ

nigah-e-nāz na dīvānoñ na farzānoñ meñ

jānkār ek vahī hai magar an-jānoñ meñ

bazm-e-mai be-ḳhud-o-be-tāb na kyuuñ ho saaqī

mauj-e-bāda hai ki dard uThtā hai paimānoñ meñ

maiñ to maiñ chauñk uThī hai ye fazā-e-ḳhāmosh

ye sadā kab kī sunī aatī hai phir kānoñ meñ

sair kar ujḌe diloñ kī jo tabī.at hai udaas

jī bahal jaate haiñ aksar inhīñ vīrānoñ meñ

vus.ateñ bhī haiñ nihāñ tañgi-e-dil meñ ġhāfil

jī bahal jaate haiñ aksar inhīñ maidānoñ meñ

jaan īmān-e-junūñ silsila jumbān-e-junūñ

kuchh kashish-hā-e-nihāñ jazb haiñ vīrānoñ meñ

ḳhanda-e-sub.h-e-azal tīrgī-e-shām-e-abad

donoñ aalam haiñ chhalakte hue paimānoñ meñ

dekh jab ālam-e-hū ko to nayā aalam hai

bastiyāñ bhī nazar aane lagīñ vīrānoñ meñ

jis jagah baiTh ga.e aag lagā kar uTThe

garmiyāñ haiñ kuchh abhī soḳhta-sāmānoñ meñ

vahshateñ bhī nazar aatī haiñ sar-e-parda-e-nāz

dāmanoñ meñ hai ye aalam na garebānoñ meñ

ek rañgīnī-e-zāhir hai gulistāñ meñ agar

ek shādābī-e-pinhāñ hai bayābānoñ meñ

jauhar-e-ġhuncha-o-gul meñ hai ik andāz-e-junūñ

kuchh bayābāñ nazar aa.e haiñ garebānoñ meñ

ab vo rañg-e-chaman-o-ḳhanda-e-gul bhī na rahe

ab vo āsār-e-junūñ bhī nahīñ dīvānoñ meñ

ab vo saaqī kī bhī āñkheñ na rahīñ rindoñ meñ

ab vo sāġhar bhī chhalakte nahīñ mai-ḳhānoñ meñ

ab vo ik soz-e-nihānī bhī diloñ meñ na rahā

ab vo jalve bhī nahīñ ishq ke kāshānoñ meñ

ab na vo raat jab ummīdeñ bhī kuchh thiiñ tujh se

ab na vo baat ġham-e-hijr ke afsānoñ meñ

ab tirā kaam hai bas ahl-e-vafā kā paanā

ab tirā naam hai bas ishq ke ġham-ḳhānoñ meñ

tā-ba-kai vāda-e-mauhūm kī tafsīl 'firāq'

shab-e-furqat kahīñ kaTtī hai in afsānoñ meñ

bastiyan DhunDh rahi hain unhen viranon mein

wahshaten baDh gain had se tere diwanon mein

nigah-e-naz na diwanon na farzanon mein

jaankar ek wahi hai magar an-jaanon mein

bazm-e-mai be-KHud-o-be-tab na kyun ho saqi

mauj-e-baada hai ki dard uThta hai paimanon mein

main to main chaunk uThi hai ye faza-e-KHamosh

ye sada kab ki suni aati hai phir kanon mein

sair kar ujDe dilon ki jo tabiat hai udas

ji bahal jate hain aksar inhin viranon mein

wusaten bhi hain nihan tangi-e-dil mein ghafil

ji bahal jate hain aksar inhin maidanon mein

jaan iman-e-junun silsila jumban-e-junun

kuchh kashish-ha-e-nihan jazb hain viranon mein

KHanda-e-subh-e-azal tirgi-e-sham-e-abad

donon aalam hain chhalakte hue paimanon mein

dekh jab aalam-e-hu ko to naya aalam hai

bastiyan bhi nazar aane lagin viranon mein

jis jagah baiTh gae aag laga kar uTThe

garmiyan hain kuchh abhi soKHta-samanon mein

wahshaten bhi nazar aati hain sar-e-parda-e-naz

damanon mein hai ye aalam na garebanon mein

ek rangini-e-zahir hai gulistan mein agar

ek shadabi-e-pinhan hai bayabanon mein

jauhar-e-ghuncha-o-gul mein hai ek andaz-e-junun

kuchh bayaban nazar aae hain garebanon mein

ab wo rang-e-chaman-o-KHanda-e-gul bhi na rahe

ab wo aasar-e-junun bhi nahin diwanon mein

ab wo saqi ki bhi aankhen na rahin rindon mein

ab wo saghar bhi chhalakte nahin mai-KHanon mein

ab wo ek soz-e-nihani bhi dilon mein na raha

ab wo jalwe bhi nahin ishq ke kashanon mein

ab na wo raat jab ummiden bhi kuchh thin tujh se

ab na wo baat gham-e-hijr ke afsanon mein

ab tera kaam hai bas ahl-e-wafa ka pana

ab tera nam hai bas ishq ke gham-KHanon mein

ta-ba-kai wada-e-mauhum ki tafsil 'firaq'

shab-e-furqat kahin kaTti hai in afsanon mein