bataun kya kisi ko main ki tum kya chiz ho kya ho

batā.ūñ kyā kisī ko maiñ ki tum kyā chiiz ho kyā ho

mirī hasrat mire armān ho merī tamannā ho

mohabbat meñ qalaq ho rañj ho sadma ho iizā ho

ye sab kuchh ho koī parda-nashīñ lekin na rusvā ho

tum apne husn kī kyā bul-havas se daad pāoge

use pūchho mire dil se ki tum kyā chiiz ho kyā ho

mire dil ko na mal talvoñ se apne meñ ye Dartā huuñ

kahīñ aisā na ho us meñ koī ḳhār-e-tamannā ho

na dekhūñ kis tarah husn-e-ḳhudā-dād un hasīnoñ kā

bhalā un zāhidoñ kī tarah kaun āñkhoñ kā andhā ho

tirī tasvīr bhī hai bā.is-e-dil-bastagī lekin

use taskīn kyā ho jo tirī bātoñ pe martā ho

'hafīz' aanā huā hai phir azīmābād meñ apnā

phir agle valvale paidā hue ab dekhiye kyā ho

bataun kya kisi ko main ki tum kya chiz ho kya ho

meri hasrat mere arman ho meri tamanna ho

mohabbat mein qalaq ho ranj ho sadma ho iza ho

ye sab kuchh ho koi parda-nashin lekin na ruswa ho

tum apne husn ki kya bul-hawas se dad paoge

use puchho mere dil se ki tum kya chiz ho kya ho

mere dil ko na mal talwon se apne mein ye Darta hun

kahin aisa na ho us mein koi KHar-e-tamanna ho

na dekhun kis tarah husn-e-KHuda-dad un hasinon ka

bhala un zahidon ki tarah kaun aankhon ka andha ho

teri taswir bhi hai bais-e-dil-bastagi lekin

use taskin kya ho jo teri baaton pe marta ho

'hafiz' aana hua hai phir azimabaad mein apna

phir agle walwale paida hue ab dekhiye kya ho