be-dili wo hai ki marne ki tamanna bhi nahin

be-dilī vo hai ki marne kī tamannā bhī nahīñ

aur jī leñ kisī ummīd pe aisā bhī nahīñ

na koī sar ko hai saudā na koī sañg se laag

koī pūchhe to kuchh aisā ġham-e-duniyā bhī nahīñ

vaqt vo hai ki jabīñ le ke karo dar kī talāsh

ajab āshufta-sarī hai ki tamāshā bhī nahīñ

apne ā.īne meñ ḳhud apnī hī sūrat huī masḳh

magar is TuuTe hue dil kā mudāvā bhī nahīñ

hū kā aalam hai koī nāra-e-mastāna-e-haq

kyā tirī bazm-e-vafā meñ koī itnā bhī nahīñ

lafz-o-ma.anī meñ nahīñ rabt magar haa.e umiid

is pe baiThe haiñ ki vo Tālne vaalā bhī nahīñ

be-ḳhudī haa.e tamannā kī na thī fursat-e-vahm

be-kasī haa.e tamāshā ki koī thā bhī nahīñ

phuul ban kar jo mahaktā thā kabhī dil ke qarīb

ḳhaar ban kar kabhī pahlū meñ khaTaktā bhī nahīñ

tum bhī kahlāte ho dāman-kash-e-duniyā 'bāqar'

sach to ye hai tumheñ jiine kā salīqa bhī nahīñ

be-dili wo hai ki marne ki tamanna bhi nahin

aur ji len kisi ummid pe aisa bhi nahin

na koi sar ko hai sauda na koi sang se lag

koi puchhe to kuchh aisa gham-e-duniya bhi nahin

waqt wo hai ki jabin le ke karo dar ki talash

ajab aashufta-sari hai ki tamasha bhi nahin

apne aaine mein KHud apni hi surat hui masKH

magar is TuTe hue dil ka mudawa bhi nahin

hu ka aalam hai koi nara-e-mastana-e-haq

kya teri bazm-e-wafa mein koi itna bhi nahin

lafz-o-mani mein nahin rabt magar hae umid

is pe baiThe hain ki wo Talne wala bhi nahin

be-KHudi hae tamanna ki na thi fursat-e-wahm

be-kasi hae tamasha ki koi tha bhi nahin

phul ban kar jo mahakta tha kabhi dil ke qarib

KHar ban kar kabhi pahlu mein khaTakta bhi nahin

tum bhi kahlate ho daman-kash-e-duniya 'baqar'

sach to ye hai tumhein jine ka saliqa bhi nahin