be-his o kaj-fahm o la-parwa kahe

be-his o kaj-fahm o lā-parvā kahe

kal muarriḳh jaane ham ko kyā kahe

is tarah rahte haiñ is ghar ke makīñ

jis tarah bahrā sune gūñgā kahe

rāz-hā-e-zabt-e-ġham kyā chhup sakeñ

hoñT jab ḳhāmosh hoñ chehra kahe

is liye har shaḳhs ko dekhā kiyā

kaash koī to mujhe apnā kahe

hai takallum ā.īna ehsās kā

jis kī jaisī soch ho vaisā kahe

paḌh chuke dariyā qasīda abr kā

kyā zabān-e-ḳhushk se sahrā kahe

bad-gumānī sirf merī zaat se

maiñ to vo kahtā huuñ jo duniyā kahe

be-his o kaj-fahm o la-parwa kahe

kal muarriKH jaane hum ko kya kahe

is tarah rahte hain is ghar ke makin

jis tarah bahra sune gunga kahe

raaz-ha-e-zabt-e-gham kya chhup saken

honT jab KHamosh hon chehra kahe

is liye har shaKHs ko dekha kiya

kash koi to mujhe apna kahe

hai takallum aaina ehsas ka

jis ki jaisi soch ho waisa kahe

paDh chuke dariya qasida abr ka

kya zaban-e-KHushk se sahra kahe

bad-gumani sirf meri zat se

main to wo kahta hun jo duniya kahe