be-zabanon ko bhi goyai sikhana chahiye

be-zabānoñ ko bhī goyā.ī sikhānā chāhiye

kalima añgusht-e-shahādat ko paḌhānā chāhiye

ḳhaal ruḳhsār-e-munavvar kā dikhānā chāhiye

chāñd meñ ai mehr-vash dhabbā lagānā chāhiye

tel merī aañkh ke til kā lagānā chāhiye

gesuoñ meñ panja-e-mizhgāñ kā shāna chāhiye

bahr-e-zīnat dāman-e-shamshīr meñ o jañg-jū

merī gardan kā tujhe paTThā lagānā chāhiye

āj-kal mahv-e-safā-e-āriz-e-dil-dār huuñ

mere rahne ko ab ā.īne kā ḳhāna chāhiye

ghaaT par talvār ke nahlā.īyo mayyat mirī

kushta-e-abrū huuñ maiñ kyā ġhusl-ḳhāna chāhiye

ai parī hai kis qadar aḌiyal mirā shab-dez-e-fikr

choTī ke mazmūñ kā us ko tāziyāna chāhiye

tā.ir-e-rañg-e-hinā kā murġh-e-jāñ hotā jalīs

ab nagīne ke shajar par āshiyānā chāhiye

ḳhat meñ likkhī hai haqīqat dasht-gardī kī agar

nāma-bar jañgalī kabūtar ko banānā chāhiye

josh-e-vahshat kah rahā hai nik.hat-e-gul kī tarah

aaj to dīvār-e-gulshan phāñd jaanā chāhiye

vasf-e-dandāñ meñ dur-e-mazmūñ kī hai ham ko talāsh

bahr-e-fikrat meñ dilā ġhota lagānā chāhiye

chīn-e-gesū se dikhā do ḳhāl-e-āriz kī bahār

mere murġh-e-rūh ko ye daam daanā chāhiye

is tamannā par huā huuñ ḳhaak maiñ o jañg-jū

merī miTTī ke tujhe meñDhe laḌānā chāhiye

āriz-e-tābāñ ke qul par bahr-e-daf-e-chashm-e-bad

ḳhāl-e-ruḳhsār-e-parī kā kaalā daanā chāhiye

panja-e-gulgūñ ke o gul ham hue haiñ andalīb

panj-shāḳhe par hamārā āshiyānā chāhiye

chal nahīñ saktā hamārā tausan-e-umr-e-ravāñ

baaḌh ke Dorī kā qātil tāziyāna chāhiye

ba.ad muddat zīnat-e-pahlū huā hai vo parī

aaj to ai dil tujhe baġhleñ bajānā chāhiye

huuñ maiñ ai jarrāh zaḳhmī teġh-e-nāz-e-yār kā

Tāñke bhī gardan ke Dorī se lagānā chāhiye

atlas-e-gardūñ se atlas hai fuzūñ ai māh-rū

kahkashāñ kā tere shimle meñ batānā chāhiye

nashsha haiñ ik bahr-e-ḳhūbī ke hamārī qabr par

chādar-e-āb-e-ravāñ kā shāmiyāna chāhiye

mid.hat-e-sāqī-e-kausar tujh ko likhnī hai 'qalaq'

pahle āb-e-hauz-e-kausar se nahānā chāhiye

be-zabanon ko bhi goyai sikhana chahiye

kalima angusht-e-shahadat ko paDhana chahiye

KHal ruKHsar-e-munawwar ka dikhana chahiye

chand mein ai mehr-wash dhabba lagana chahiye

tel meri aankh ke til ka lagana chahiye

gesuon mein panja-e-mizhgan ka shana chahiye

bahr-e-zinat daman-e-shamshir mein o jang-ju

meri gardan ka tujhe paTTha lagana chahiye

aaj-kal mahw-e-safa-e-ariz-e-dil-dar hun

mere rahne ko ab aaine ka KHana chahiye

ghaT par talwar ke nahlaiyo mayyat meri

kushta-e-abru hun main kya ghusl-KHana chahiye

ai pari hai kis qadar aDiyal mera shab-dez-e-fikr

choTi ke mazmun ka us ko taziyana chahiye

tair-e-rang-e-hina ka murgh-e-jaan hota jalis

ab nagine ke shajar par aashiyana chahiye

KHat mein likkhi hai haqiqat dasht-gardi ki agar

nama-bar jangali kabutar ko banana chahiye

josh-e-wahshat kah raha hai nikhat-e-gul ki tarah

aaj to diwar-e-gulshan phand jaana chahiye

wasf-e-dandan mein dur-e-mazmun ki hai hum ko talash

bahr-e-fikrat mein dila ghota lagana chahiye

chin-e-gesu se dikha do KHal-e-ariz ki bahaar

mere murgh-e-ruh ko ye dam dana chahiye

is tamanna par hua hun KHak main o jang-ju

meri miTTi ke tujhe meinDhe laDana chahiye

aariz-e-taban ke qul par bahr-e-daf-e-chashm-e-bad

KHal-e-ruKHsar-e-pari ka kala dana chahiye

panja-e-gulgun ke o gul hum hue hain andalib

panj-shaKHe par hamara aashiyana chahiye

chal nahin sakta hamara tausan-e-umr-e-rawan

baDh ke Dori ka qatil taziyana chahiye

baad muddat zinat-e-pahlu hua hai wo pari

aaj to ai dil tujhe baghlen bajaana chahiye

hun main ai jarrah zaKHmi tegh-e-naz-e-yar ka

Tanke bhi gardan ke Dori se lagana chahiye

atlas-e-gardun se atlas hai fuzun ai mah-ru

kahkashan ka tere shimle mein batana chahiye

nashsha hain ek bahr-e-KHubi ke hamari qabr par

chadar-e-ab-e-rawan ka shamiyana chahiye

midhat-e-saqi-e-kausar tujh ko likhni hai 'qalaq'

pahle aab-e-hauz-e-kausar se nahana chahiye