بچھڑ کے تجھ سے جو ہم جان سے جدا ہوئے ہیں

بچھڑ کے تجھ سے جو ہم جان سے جدا ہوئے ہیں

یقین رکھ کہ بڑی شان سے جدا ہوئے ہیں

ضرور موسم وحشت کی آمد آمد ہے

یہ ہم جو اپنے گریبان سے جدا ہوئے ہیں

بلا رہی ہے وہ نا ممکنات کی دنیا

اسی لئے حد امکان سے جدا ہوئے ہیں

سبھی زمان و مکاں ہم سے دور جا پہنچے

وہ ایک پل کہ ترے دھیان سے جدا ہوئے ہیں

وصال چاہتی ہیں ہم سے مشکلیں کیا کیا

بس ایک لمحۂ آسان سے جدا ہوئے ہیں

یہ فیصلہ تھا کہ جائیں گے روح سے ملنے

تو پہلے جسم کے سامان سے جدا ہوئے ہیں