bichhaDte waqt mujhe jine ki dua di hai

bichhaḌte vaqt mujhe jiine kī du'ā dī hai

tamām 'umr taḌapne kī ye sazā dī hai

dhaḌak rahā hai ye dil aaj phir usī dhun par

bichhaḌne vaale ne shāyad ki phir sadā dī hai

mujhe bhī roktī hai yaar merī ḳhuddārī

anā kī tum ne bhī dīvār ik uThā dī hai

lagī hai thamne mirī saañs un kī chaukhaT par

ye zindagī ne bhī kis moḌ par daġhā dī hai

jo de rahe haiñ dilāsa makāñ ke jalne par

lagī jo aag unhīñ logoñ ne havā dī hai

bichhaDte waqt mujhe jine ki du'a di hai

tamam 'umr taDapne ki ye saza di hai

dhaDak raha hai ye dil aaj phir usi dhun par

bichhaDne wale ne shayad ki phir sada di hai

mujhe bhi rokti hai yar meri KHuddari

ana ki tum ne bhi diwar ek uTha di hai

lagi hai thamne meri sans un ki chaukhaT par

ye zindagi ne bhi kis moD par dagha di hai

jo de rahe hain dilasa makan ke jalne par

lagi jo aag unhin logon ne hawa di hai