bin tere kya karun jahan le kar

bin tire kyā karūñ jahāñ le kar

ye zamīñ aur ye āsmāñ le kar

ashk chhalkā.e baal bikhrā.e

vo ga.e merī dāstāñ le kar

do jahāñ kī talab se fāriġh huuñ

terā dar terā āstāñ le kar

uḌ ga.e sab chaman ko rah ga.e ham

chaar tinkoñ kā āshiyāñ le kar

rañg-e-mahfil tirā baḌhāne ko

aa.e ham chashm-e-ḳhūñ-fishāñ le kar

sab ga.e pūchhne mizāj un kā

maiñ gayā apnī dāstāñ le kar

sab phire le ke apne yūsuf ko

maiñ phirā gard-e-kārvāñ le kar

sab uḌe le ke phuul gulshan se

aur ham apnā āshiyāñ le kar

merī taqdīr kyā batā.ūñ 'jalīl'

jā rahī hai kahāñ kahāñ le kar

bin tere kya karun jahan le kar

ye zamin aur ye aasman le kar

ashk chhalkae baal bikhrae

wo gae meri dastan le kar

do jahan ki talab se farigh hun

tera dar tera aastan le kar

uD gae sab chaman ko rah gae hum

chaar tinkon ka aashiyan le kar

rang-e-mahfil tera baDhane ko

aae hum chashm-e-KHun-fishan le kar

sab gae puchhne mizaj un ka

main gaya apni dastan le kar

sab phire le ke apne yusuf ko

main phira gard-e-karwan le kar

sab uDe le ke phul gulshan se

aur hum apna aashiyan le kar

meri taqdir kya bataun 'jalil'

ja rahi hai kahan kahan le kar