bina-e-sajda hun sajde ki ibtida hun main

binā-e-sajda huuñ sajde kī ibtidā huuñ maiñ

jo ḳhud-numā haiñ vo dekheñ ḳhudā-numā huuñ maiñ

mirā vajūd hai elān-e-kalima-e-tauhīd

jahāñ meñ ġhaib se aa.ī huī nidā huuñ maiñ

mujhe sulā.egī ab kyā havā-e-ḳhvāb-e-fanā

ziyā-e-husn se bedār ho chukā huuñ maiñ

ajal kā kaam nahīñ merī hall-e-mushkil meñ

ki manzil-e-ġham-e-hastī se baḌh gayā huuñ maiñ

kashish mirī yahīñ manzil ko khīñch lā.egī

yahī to naaz hai mujh ko shikasta-pā huuñ maiñ

jabīn-e-shauq ko kyā imtiyāz-e-dair-o-haram

kise ḳhabar hai ki kis dar pe jibah-sā huuñ maiñ

kisī kī lauh-e-jabīñ par shikan ye kahtī hai

ki be-ḳhudī meñ koī raaz kah gayā huuñ maiñ

bas ai talātum-e-tūfān-e-ārzū bas kar

ki ab tabāh safīne kā nāḳhudā huuñ maiñ

ma.āl-e-kashmakash-e-dard kuchh huā 'hirmāñ'

sunā hai maut kī ik niiñd le rahā huuñ maiñ

bina-e-sajda hun sajde ki ibtida hun main

jo KHud-numa hain wo dekhen KHuda-numa hun main

mera wajud hai elan-e-kalima-e-tauhid

jahan mein ghaib se aai hui nida hun main

mujhe sulaegi ab kya hawa-e-KHwab-e-fana

ziya-e-husn se bedar ho chuka hun main

ajal ka kaam nahin meri hall-e-mushkil mein

ki manzil-e-gham-e-hasti se baDh gaya hun main

kashish meri yahin manzil ko khinch laegi

yahi to naz hai mujh ko shikasta-pa hun main

jabin-e-shauq ko kya imtiyaz-e-dair-o-haram

kise KHabar hai ki kis dar pe jibah-sa hun main

kisi ki lauh-e-jabin par shikan ye kahti hai

ki be-KHudi mein koi raaz kah gaya hun main

bas ai talatum-e-tufan-e-arzu bas kar

ki ab tabah safine ka naKHuda hun main

maal-e-kashmakash-e-dard kuchh hua 'hirman'

suna hai maut ki ek nind le raha hun main