biradaron ka mizaj badle ya ghar ka sara riwaj badle

birādaroñ kā mizāj badle yā ghar kā saarā rivāj badle

rahī ye ḳhvāhish hamesha apnī jo kal badalnā hai aaj badle

hameñ to matlab hai roTiyoñ se jo bāl-bachchoñ kā peT bhar de

ġharaz nahīñ hai koī bhī ham ko ye taḳht badle ki taaj badle

abhī bhī zehnoñ meñ sādgī hai ki gaañv chhoḌe zamāna biitā

ki shahr meñ bas ga.e haiñ lekin kahāñ hamāre mizāj badle

jo vaqt ke saath chalte rahte ye baat paidā na hotī hargiz

ho mustahiq tum sazā ke yuuñ bhī na tum ne apne rivāj badle

bure-bhale kā tū ḳhud hai mālik jo dil meñ aa.e vo kar le 'saifī'

tujhe badalnā hai to badal jā nahīñ ye mumkin samāj badle

biradaron ka mizaj badle ya ghar ka sara riwaj badle

rahi ye KHwahish hamesha apni jo kal badalna hai aaj badle

hamein to matlab hai roTiyon se jo baal-bachchon ka peT bhar de

gharaz nahin hai koi bhi hum ko ye taKHt badle ki taj badle

abhi bhi zehnon mein sadgi hai ki ganw chhoDe zamana bita

ki shahr mein bas gae hain lekin kahan hamare mizaj badle

jo waqt ke sath chalte rahte ye baat paida na hoti hargiz

ho mustahiq tum saza ke yun bhi na tum ne apne riwaj badle

bure-bhale ka tu KHud hai malik jo dil mein aae wo kar le 'saifi'

tujhe badalna hai to badal ja nahin ye mumkin samaj badle