bujha sa rahta hai dil jab se hain watan se juda

bujhā sā rahtā hai dil jab se haiñ vatan se judā

vo sehn-e-bāġh nahīñ sair-e-māhtāb nahīñ

base hue haiñ nigāhoñ meñ vo hasīñ kūche

har ek zarra jahāñ kam ze-āftāb nahīñ

vo bāġh-o-rāġh ke dil-chasp-o-dil-nashīñ manzar

ki jin ke hote hue ḳhuld misl-e-ḳhvāb nahīñ

vo jūebār-e-ravāñ kā tarab-fazā paanī

sharāb se nahīñ kuchh kam agar sharāb nahīñ

ba-rañg-e-zulf pareshāñ vo mauj-hā-e-ravāñ

ki jin kī yaad meñ rātoñ ko fikr-e-ḳhvāb nahīñ

samā rahe haiñ nazar meñ vo mahv-shān-e-haram

haram meñ jin ke sitāre bhī bāryāb nahīñ

vatan kā chheḌ diyā kis ne tazkira 'aḳhtar'

ki chashm-e-shauq ko phir ārzū-e-ḳhvāb nahīñ

bujha sa rahta hai dil jab se hain watan se juda

wo sehn-e-bagh nahin sair-e-mahtab nahin

base hue hain nigahon mein wo hasin kuche

har ek zarra jahan kam ze-aftab nahin

wo bagh-o-ragh ke dil-chasp-o-dil-nashin manzar

ki jin ke hote hue KHuld misl-e-KHwab nahin

wo juebar-e-rawan ka tarab-faza pani

sharab se nahin kuchh kam agar sharab nahin

ba-rang-e-zulf pareshan wo mauj-ha-e-rawan

ki jin ki yaad mein raaton ko fikr-e-KHwab nahin

sama rahe hain nazar mein wo mahw-shan-e-haram

haram mein jin ke sitare bhi baryab nahin

watan ka chheD diya kis ne tazkira 'aKHtar'

ki chashm-e-shauq ko phir aarzu-e-KHwab nahin