bujhti shama ki surat kyun afsurda khaDe ho khiDki mein

bujhtī sham.a kī sūrat kyuuñ afsurda khaḌe ho khiḌkī meñ

dekho shaam hai kis darja dilkash is dhuup kī vardī meñ

vahm-o-gumāñ ke sahrāoñ meñ phuul khile tirī yādoñ ke

aur charāġhāñ duur tilak hai sāñsoñ kī is vaadī meñ

qahr-o-ġhazab ke mimbar par hāthoñ meñ liye kashkol-e-vafā

jhāñk rahā thā sūraj bhī kal ġhaur se ek surāhī meñ

duur khaḌā ho kar maiñ is liye pahroñ dekhtā rahtā huuñ

qaid bahut sī yādeñ haiñ mirī is vīrān havelī meñ

tahoñ kī pyaas bhī sat.h par ab saaf dikhā.ī detī hai

DhūñD rahe haiñ jaane kyā ye bādal niilī chhatrī meñ

ek hai andesha mujh ko kahīñ mere mar jaane ke ba.ad

bech na deñ mere ghar vaale mirī qīmtī ġhazleñ raddī meñ

rañg aur ḳhushbū kī mānind hai merā sarāpā bhī sāhib

qaid rakhegā āḳhir kab tak vaqt mujhe yuuñ muTThī meñ

bahr-e-mohabbat ke sāhil kī sair bahut kar lī ham ne

aao zarā ab ham bhī dekheñ baiTh ke pyaar kī kashtī meñ

hirs-o-havas ke saare pujārī ek jagah haiñ aaj jama.a

vaqt kī shāḳh pe shāyad koī phuul khilā hai jaldī meñ

bujhti shama ki surat kyun afsurda khaDe ho khiDki mein

dekho sham hai kis darja dilkash is dhup ki wardi mein

wahm-o-guman ke sahraon mein phul khile teri yaadon ke

aur charaghan dur tilak hai sanson ki is wadi mein

qahr-o-ghazab ke mimbar par hathon mein liye kashkol-e-wafa

jhank raha tha suraj bhi kal ghaur se ek surahi mein

dur khaDa ho kar main is liye pahron dekhta rahta hun

qaid bahut si yaaden hain meri is viran haweli mein

tahon ki pyas bhi sath par ab saf dikhai deti hai

DhunD rahe hain jaane kya ye baadal nili chhatri mein

ek hai andesha mujh ko kahin mere mar jaane ke baad

bech na den mere ghar wale meri qimti ghazlen raddi mein

rang aur KHushbu ki manind hai mera sarapa bhi sahib

qaid rakhega aaKHir kab tak waqt mujhe yun muTThi mein

bahr-e-mohabbat ke sahil ki sair bahut kar li hum ne

aao zara ab hum bhi dekhen baiTh ke pyar ki kashti mein

hirs-o-hawas ke sare pujari ek jagah hain aaj jama

waqt ki shaKH pe shayad koi phul khila hai jaldi mein