buniyaad bhar ke lafz ki diwar-o-dar banao

buniyād bhar ke lafz kī dīvār-o-dar banāo

apnī zamīñ talāsh karo apnā ghar banāo

har ik ke bus kī baat nahīñ ḳhvāb dekhnā

is 'aib par DaTe raho is ko hunar banāo

taaki kisī kī aañkh meñ mahfūz ho sakeñ

jo naqsh zehn-o-dil meñ haiñ dīvār par banāo

ye āḳhirī charāġh bhī gul kar do vaqt par

apne makāñ ko aur bhī tārīk-tar banāo

manzar ko saañs letā huā honā chāhiye

phūloñ pe baiThtī huī titlī ke par banāo

phir us ke baa'd mujh ko uThā lenā chaak se

maiñ ban chukā huuñ bus mire shānoñ pe sar banāo

'āzar' vo mauj-e-shar biphar aa.ī mirī taraf

jis se bigaḌ gayā mirī hastī kā har banāo

buniyaad bhar ke lafz ki diwar-o-dar banao

apni zamin talash karo apna ghar banao

har ek ke bus ki baat nahin KHwab dekhna

is 'aib par DaTe raho is ko hunar banao

taki kisi ki aankh mein mahfuz ho saken

jo naqsh zehn-o-dil mein hain diwar par banao

ye aaKHiri charagh bhi gul kar do waqt par

apne makan ko aur bhi tarik-tar banao

manzar ko sans leta hua hona chahiye

phulon pe baiThti hui titli ke par banao

phir us ke ba'd mujh ko uTha lena chaak se

main ban chuka hun bus mere shanon pe sar banao

'azar' wo mauj-e-shar biphar aai meri taraf

jis se bigaD gaya meri hasti ka har banao