chah kar bhi na koi un se gila rakhta hun

chaah kar bhī na koī un se gila rakhtā huuñ

apne jazbāt kisī tarah dabā rakhtā huuñ

apnī taklīf kā kartā nahīñ iz.hār kabhī

ashk āñkhoñ meñ to ġham dil meñ chhupā rakhtā huuñ

sar-kashī us kī bhalā kaise sahūñ maiñ har baar

maiñ bhī insān huuñ kuchh maiñ bhī anā rakhtā huuñ

lazzat-e-dard hai vo jis ne mujhe rokā hai

varna maiñ apne har ik ġham kī davā rakhtā huuñ

kuchh sukūñ paatā huuñ is vāste tanhā.ī meñ

girya-o-nāla-o-fariyād bapā rakhtā huuñ

saḳht mushkil meñ bhī māyūs nahīñ hotā kabhī

maiñ añdheroñ meñ bhī ummīd-e-ziyā rakhtā huuñ

dekh 'tanvīr' mire hāl-e-pareshāñ ko dekh

dekh kyā ishq-o-mohabbat kā sila rakhtā huuñ

chah kar bhi na koi un se gila rakhta hun

apne jazbaat kisi tarah daba rakhta hun

apni taklif ka karta nahin izhaar kabhi

ashk aankhon mein to gham dil mein chhupa rakhta hun

sar-kashi us ki bhala kaise sahun main har bar

main bhi insan hun kuchh main bhi ana rakhta hun

lazzat-e-dard hai wo jis ne mujhe roka hai

warna main apne har ek gham ki dawa rakhta hun

kuchh sukun pata hun is waste tanhai mein

girya-o-nala-o-fariyaad bapa rakhta hun

saKHt mushkil mein bhi mayus nahin hota kabhi

main andheron mein bhi ummid-e-ziya rakhta hun

dekh 'tanwir' mere haal-e-pareshan ko dekh

dekh kya ishq-o-mohabbat ka sila rakhta hun