chahiyen mujhko nahin zarrin qafas ki putliyan

chāhiyeñ mujh ko nahīñ zarrīñ qafas kī putliyāñ

āshiyāñ jānūñ jo hoveñ ḳhār-o-ḳhas kī putliyāñ

ho ga.iiñ be-rañg jab agle baras kī putliyāñ

ḳhuun ro kar ham ne kiiñ rañgīñ qafas kī putliyāñ

hai ye faulādī qafas mujh nā-tavāñ kā kyā karūñ

kis tarah toḌūñ nahīñ haiñ mere bas kī putliyāñ

kyā ḳhudā kī shaan hai aatī hai jab fasl-e-bahār

sab harī ho jaatī haiñ mere qafas kī putliyāñ

jab kabhī kunj-e-qafas meñ kī hai maiñ ne āh-e-garm

mom ho kar bah ga.ī haiñ pesh-o-pas kī putliyāñ

ghar qafas ko maiñ samajhtā huuñ asīrī ko murād

jāntā huuñ apnī aahoñ ko havas kī putliyāñ

paTriyāñ mere qafas kī shāḳh-e-gul se kam nahīñ

loch ye dekhā na dekhīñ aisī ras kī putliyāñ

gūñjne lagtā hai ye bhī jab fuġhāñ kartā huuñ maiñ

nasb haiñ mere qafas meñ kyā jaras kī putliyāñ

dekhiye shauq-e-asīrī meñ jakaḌne ke liye

ho ga.iiñ resham kā lachhā sab qafas kī putliyāñ

ro rahī hai dekh kar lailā jo us ko ai 'sharaf'

pasliyāñ majnūñ kī haiñ mere qafas kī putliyāñ

chahiyen mujh ko nahin zarrin qafas ki putliyan

aashiyan jaanun jo howen KHar-o-KHas ki putliyan

ho gain be-rang jab agle baras ki putliyan

KHun ro kar hum ne kin rangin qafas ki putliyan

hai ye fauladi qafas mujh na-tawan ka kya karun

kis tarah toDun nahin hain mere bas ki putliyan

kya KHuda ki shan hai aati hai jab fasl-e-bahaar

sab hari ho jati hain mere qafas ki putliyan

jab kabhi kunj-e-qafas mein ki hai main ne aah-e-garm

mom ho kar bah gai hain pesh-o-pas ki putliyan

ghar qafas ko main samajhta hun asiri ko murad

jaanta hun apni aahon ko hawas ki putliyan

paTriyan mere qafas ki shaKH-e-gul se kam nahin

loch ye dekha na dekhin aisi ras ki putliyan

gunjne lagta hai ye bhi jab fughan karta hun main

nasb hain mere qafas mein kya jaras ki putliyan

dekhiye shauq-e-asiri mein jakaDne ke liye

ho gain resham ka lachha sab qafas ki putliyan

ro rahi hai dekh kar laila jo us ko ai 'sharaf'

pasliyan majnun ki hain mere qafas ki putliyan