chalne lage na hijr ki aandhi kitab mein

chalne lage na hijr kī āñdhī kitāb meñ

tahrīr kar na mujh ko havā kī kitāb meñ

vo chehra inhimāk se paḌh to liyā magar

gum ho ga.ī hai aañkh kī putlī kitāb meñ

ik mauj-e-rang ab bhī ravāñ kāġhazoñ pe hai

ik roz rakh gayā thā vo titlī kitāb meñ

maiñ us kā intizār karūñgā tamām 'umr

vo rakh ke bhuul jā.egā chiTThī kitāb meñ

merī tarah likhe to lahū se ġhazal koī

rakkhe to koī kaaT ke uñglī kitāb meñ

'be-dil' dar-e-kalīsā-e-mazmūñ na band kar

bajne de harf-o-saut kī ghanTī kitāb meñ

chalne lage na hijr ki aandhi kitab mein

tahrir kar na mujh ko hawa ki kitab mein

wo chehra inhimak se paDh to liya magar

gum ho gai hai aankh ki putli kitab mein

ek mauj-e-rang ab bhi rawan kaghazon pe hai

ek roz rakh gaya tha wo titli kitab mein

main us ka intizar karunga tamam 'umr

wo rakh ke bhul jaega chiTThi kitab mein

meri tarah likhe to lahu se ghazal koi

rakkhe to koi kaT ke ungli kitab mein

'be-dil' dar-e-kalisa-e-mazmun na band kar

bajne de harf-o-saut ki ghanTi kitab mein