chaman ka zikr kya ab to KHuda ko yaad karte hain

chaman kā zikr kyā ab to ḳhudā ko yaad karte haiñ

ḳhushī sayyād ko hotī hai jab fariyād karte haiñ

na sharmāo agar ham shikva-e-bedād karte haiñ

mohabbat hai tumhārī ādatoñ ko yaad karte haiñ

hamārī dāstān-e-ġham rulātī hai zamāne ko

vo ham haiñ jo zabān ġhair se fariyād karte haiñ

ḳhudā ābād rakhe ham-safīrān-e-gulistāñ ko

jo koī phuul khultā hai to ham ko yaad karte haiñ

asīrān-e-qafas ḳhud bhī bahut kuchh kah guzarte haiñ

chaman ke tazkire aapas meñ jab sayyād karte haiñ

nahīñ ma.alūm maiñ kis haal meñ huuñ bāġh-e-ālam meñ

qafas vaale bhī mujh ko dekh kar fariyād karte haiñ

ḳhud un kā husn merī dād-ḳhvāhī un se kartā hai

vo ā.īna liye haiñ aur mujh ko yaad karte haiñ

adū sayyād gulchīñ kyuuñ ho mere nasheman ke

ye tinke bhī haiñ is qābil jinheñ barbād karte haiñ

lahad par chalne vaale tham ki ham kuchh kah nahīñ sakte

zamīñ rakhtī hai muñh par haath jab fariyād karte haiñ

vo ḳhūbāñ jahāñ ashkoñ se jin kā husn sīñchā thā

vahī ba.ad-e-fanā miTTī mirī barbād karte haiñ

sar-e-gor-e-ġharībāñ kuchh na pūchho hāl-e-dil 'sāqib'

zamāna jin ko bhūlā hai ham un ko yaad karte haiñ

chaman ka zikr kya ab to KHuda ko yaad karte hain

KHushi sayyaad ko hoti hai jab fariyaad karte hain

na sharmao agar hum shikwa-e-bedad karte hain

mohabbat hai tumhaari aadaton ko yaad karte hain

hamari dastan-e-gham rulati hai zamane ko

wo hum hain jo zaban ghair se fariyaad karte hain

KHuda aabaad rakhe ham-safiran-e-gulistan ko

jo koi phul khulta hai to hum ko yaad karte hain

asiran-e-qafas KHud bhi bahut kuchh kah guzarte hain

chaman ke tazkire aapas mein jab sayyaad karte hain

nahin malum main kis haal mein hun bagh-e-alam mein

qafas wale bhi mujh ko dekh kar fariyaad karte hain

KHud un ka husn meri dad-KHwahi un se karta hai

wo aaina liye hain aur mujh ko yaad karte hain

adu sayyaad gulchin kyun ho mere nasheman ke

ye tinke bhi hain is qabil jinhen barbaad karte hain

lahad par chalne wale tham ki hum kuchh kah nahin sakte

zamin rakhti hai munh par hath jab fariyaad karte hain

wo KHuban jahan ashkon se jin ka husn sincha tha

wahi baad-e-fana miTTi meri barbaad karte hain

sar-e-gor-e-ghariban kuchh na puchho haal-e-dil 'saqib'

zamana jin ko bhula hai hum un ko yaad karte hain