chaman mein rahne de kaun aashiyan nahin malum
chaman meñ rahne de kaun āshiyāñ nahīñ ma.alūm
nihāl kis ko kare bāġhbāñ nahīñ ma.alūm
mire sanam kā kisī ko makāñ nahīñ ma.alūm
ḳhudā kā naam sunā hai nishāñ nahīñ ma.alūm
aḳhīr ho ga.e ġhaflat meñ din javānī ke
bahār-e-umr huī kab ḳhizāñ nahīñ ma.alūm
ye ishtiyāq-e-shahādat meñ mahv thā dam-e-qatl
lage haiñ zaḳhm badan par kahāñ nahīñ ma.alūm
sunā jo zikr-e-ilāhī to us sanam ne kahā
ayaañ ko jānte haiñ ham nihāñ nahīñ ma.alūm
kiyā hai kis ne tarīq-e-sulūk se āgāh
murīd kis kā hai pīr-e-muġhāñ nahīñ ma.alūm
mirī tarah to nahīñ us ko ishq kā āzār
ye zard rahtī hai kyuuñ za.afarāñ nahīñ ma.alūm
jahān o kār-e-jahāñ se huuñ be-ḳhabar maiñ mast
zamīñ kidhar hai kahāñ āsmāñ nahīñ ma.alūm
supurd kis ke mire ba.ad ho amānat-e-ishq
uThā.e kaun ye bār-e-girāñ nahīñ ma.alūm
ḳhamosh aisā huā huuñ maiñ kam-dimāġhī se
dahan meñ hai ki nahīñ hai zabāñ nahīñ ma.alūm
mirī tumhārī mohabbat hai shohra-e-āfāq
kise haqīqat-e-māh-o-katāñ nahīñ ma.alūm
kis ā.īne meñ nahīñ jalva-gar tirī timsāl
tujhe samajhte haiñ ham īn-o-āñ nahīñ ma.alūm
milā thā ḳhizr ko kis tarah chashma-e-haivāñ
hameñ to yaar kā apne dahāñ nahīñ ma.alūm
khulī hai ḳhāna-e-sayyād meñ hamārī aañkh
qafas ko jānte haiñ āshiyāñ nahīñ ma.alūm
tarīq-e-ishq meñ dīvāna-vār phirtā huuñ
ḳhabar gaḌhe kī nahīñ hai kuaañ nahīñ ma.alūm
jo ho to shauq hī ho kū-e-yār kā haadī
kisī ko varna sabīl-e-jināñ nahīñ ma.alūm
dahan meñ aap ke albatta ham ko hujjat hai
kamar kā bhed jo pūchhūñ miyāñ nahīñ ma.alūm
nasīm-e-sub.h ne kaisā ye us ko bhaḌkāyā
hanūz ātish-e-gul kā dhuāñ nahīñ ma.alūm
suneñge vāqi.a us kā zabān-e-sausan se
shahīd kis kā hai ye arġhavāñ nahīñ ma.alūm
kanār-e-āb chale daur-e-jām yā lab-e-kisht
shikār hove bat-e-mai kahāñ nahīñ ma.alūm
rasā.ī jis kī nahīñ ai sanam dar-e-dil tak
yaqīñ hai us ko tirā āstāñ nahīñ ma.alūm
ajab nahīñ hai jo ahl-e-suḳhan hoñ gosha-nashīñ
kisī dahan meñ zabāñ kā makāñ nahīñ ma.alūm
chhuTeñge ziist ke phande se kis din ai 'ātish'
janāza hogā kab apnā ravāñ nahīñ ma.alūm
chaman mein rahne de kaun aashiyan nahin malum
nihaal kis ko kare baghban nahin malum
mere sanam ka kisi ko makan nahin malum
KHuda ka nam suna hai nishan nahin malum
aKHir ho gae ghaflat mein din jawani ke
bahaar-e-umr hui kab KHizan nahin malum
ye ishtiyaq-e-shahadat mein mahw tha dam-e-qatl
lage hain zaKHm badan par kahan nahin malum
suna jo zikr-e-ilahi to us sanam ne kaha
ayan ko jaante hain hum nihan nahin malum
kiya hai kis ne tariq-e-suluk se aagah
murid kis ka hai pir-e-mughan nahin malum
meri tarah to nahin us ko ishq ka aazar
ye zard rahti hai kyun zafaran nahin malum
jahan o kar-e-jahan se hun be-KHabar main mast
zamin kidhar hai kahan aasman nahin malum
supurd kis ke mere baad ho amanat-e-ishq
uThae kaun ye bar-e-giran nahin malum
KHamosh aisa hua hun main kam-dimaghi se
dahan mein hai ki nahin hai zaban nahin malum
meri tumhaari mohabbat hai shohra-e-afaq
kise haqiqat-e-mah-o-katan nahin malum
kis aaine mein nahin jalwa-gar teri timsal
tujhe samajhte hain hum in-o-an nahin malum
mila tha KHizr ko kis tarah chashma-e-haiwan
hamein to yar ka apne dahan nahin malum
khuli hai KHana-e-sayyaad mein hamari aankh
qafas ko jaante hain aashiyan nahin malum
tariq-e-ishq mein diwana-war phirta hun
KHabar gaDhe ki nahin hai kuan nahin malum
jo ho to shauq hi ho ku-e-yar ka hadi
kisi ko warna sabil-e-jinan nahin malum
dahan mein aap ke albatta hum ko hujjat hai
kamar ka bhed jo puchhun miyan nahin malum
nasim-e-subh ne kaisa ye us ko bhaDkaya
hanuz aatish-e-gul ka dhuan nahin malum
sunenge waqia us ka zaban-e-sausan se
shahid kis ka hai ye arghawan nahin malum
kanar-e-ab chale daur-e-jam ya lab-e-kisht
shikar howe bat-e-mai kahan nahin malum
rasai jis ki nahin ai sanam dar-e-dil tak
yaqin hai us ko tera aastan nahin malum
ajab nahin hai jo ahl-e-suKHan hon gosha-nashin
kisi dahan mein zaban ka makan nahin malum
chhuTenge zist ke phande se kis din ai 'atish'
janaza hoga kab apna rawan nahin malum
Source:
Kulliyat-e-Khwaja Haidar Ali Aatish (Pg. 154)
- Author: Haidar Ali Aatish
-
- Publisher: Munshi Nawal Kishor, Lucknow
Additional information available
Click on the INTERESTING button to view additional information associated with this sher.
About this sher
Lorem ipsum dolor sit amet, consectetur adipiscing elit. Morbi volutpat porttitor tortor, varius dignissim.
rare Unpublished content
This ghazal contains ashaar not published in the public domain. These are marked by a red line on the left.