chashm-e-KHush-ab ki tamsil mein rahne wale

chashm-e-ḳhush-āb kī tamsīl meñ rahne vaale

ham parinde haiñ isī jhiil meñ rahne vaale

ham ko raas aatī nahīñ kūcha-e-jānāñ kī havā

ham haiñ alfāz kī tahvīl meñ rahne vaale

kitne āshob gazīda se nazar aate haiñ

usrat-e-ḳhāna-e-takmīl meñ rahne vaale

apne alfāz se tajsīm karūñgā tujh ko

mujh pe vā ho merī taḳh.īl meñ rahne vaale

vus.at-e-zaḳhm kā tujh ko bhī nahīñ andāza

ai mire zaḳhm kī tāvīl meñ rahne vaale

kis liye karte ho tum harf-e-malāmat se gurez

ham kahāñ sohbat-e-jibrīl meñ rahne vaale

mere lafzoñ ko bhī dete haiñ vo āyāt-e-shifā

haañ vahī hurmat-e-injīl meñ rahne vaale

jā tujhe 'shāhid' zī-jāh ne āzād kiyā

ai mire hukm kī ta.amīl meñ rahne vaale

chashm-e-KHush-ab ki tamsil mein rahne wale

hum parinde hain isi jhil mein rahne wale

hum ko ras aati nahin kucha-e-jaanan ki hawa

hum hain alfaz ki tahwil mein rahne wale

kitne aashob gazida se nazar aate hain

usrat-e-KHana-e-takmil mein rahne wale

apne alfaz se tajsim karunga tujh ko

mujh pe wa ho meri taKHil mein rahne wale

wusat-e-zaKHm ka tujh ko bhi nahin andaza

ai mere zaKHm ki tawil mein rahne wale

kis liye karte ho tum harf-e-malamat se gurez

hum kahan sohbat-e-jibril mein rahne wale

mere lafzon ko bhi dete hain wo aayat-e-shifa

han wahi hurmat-e-injil mein rahne wale

ja tujhe 'shahid' zi-jah ne aazad kiya

ai mere hukm ki tamil mein rahne wale