chehra hua main aur meri taswir hue sab

chehra huā maiñ aur mirī tasvīr hue sab

maiñ lafz huā mujh meñ hī zanjīr hue sab

buniyād bhī merī dar-o-dīvār bhī mere

ta.amīr huā maiñ ki ye ta.amīr hue sab

vaise hī likhoge to mirā naam bhī hogā

jo lafz likhe vo mirī jāgīr hue sab

marte haiñ magar maut se pahle nahīñ marte

ye vāqi.a aisā hai ki dil-gīr hue sab

vo ahl-e-qalam sāya-e-rahmat kī tarah the

ham itne ghaTe apnī hī ta.azīr hue sab

us lafz kī mānind jo khultā hī chalā jaa.e

ye zāt-o-zamāñ mujh se hī tahrīr hue sab

itnā suḳhan-e-'mīr' nahīñ sahl ḳhudā ḳhair

naqqād bhī ab mo'taqid-e-'mīr' hue sab

chehra hua main aur meri taswir hue sab

main lafz hua mujh mein hi zanjir hue sab

buniyaad bhi meri dar-o-diwar bhi mere

tamir hua main ki ye tamir hue sab

waise hi likhoge to mera nam bhi hoga

jo lafz likhe wo meri jagir hue sab

marte hain magar maut se pahle nahin marte

ye waqia aisa hai ki dil-gir hue sab

wo ahl-e-qalam saya-e-rahmat ki tarah the

hum itne ghaTe apni hi tazir hue sab

us lafz ki manind jo khulta hi chala jae

ye zat-o-zaman mujh se hi tahrir hue sab

itna suKHan-e-'mir' nahin sahl KHuda KHair

naqqad bhi ab mo'taqid-e-'mir' hue sab