chhattis sal ka bhi sannyas chhin kar

chhattīs saal kā bhī sannyās chhīn kar

ye kaun le gayā mirā ban-bās chhīn kar

ai shāh-e-karbalā mirī imdād ko ab aa

ḳhush hai ġhanīm mujh se mirī pyaas chhīn kar

saaya na ho to dhuup jalātī hai jism ko

tum kyā karoge dhartī se ākās chhīn kar

jiine kī jo umañg thī vo bhī nahīñ rahī

be-ās kar gayā koī har aas chhīn kar

tum ne bujhā.ī bajtī huī bañsiyoñ kī kuuk

mujh se mire vajūd ke taT taas chhīn kar

kuchh to batā maiñ terā gunahgār kab huā

kyuuñ aatmā ko bhrashT kiyā maas chhīn kar

mātam-kunāñ haiñ saare asātīrī vāqiye

tanhā qalam ko kar diyā qirtās chhīn kar

rāvan ne phir judā kiyā siitā ko raam se

phir kalpanā bujhā.ī ga.ī qayās chhīn kar

sanjog jug janam ke hue qat.a alvidā.a

ban ko jalāyā aag ne bū baas chhīn kar

chhattis sal ka bhi sannyas chhin kar

ye kaun le gaya mera ban-bas chhin kar

ai shah-e-karbala meri imdad ko ab aa

KHush hai ghanim mujh se meri pyas chhin kar

saya na ho to dhup jalati hai jism ko

tum kya karoge dharti se aakas chhin kar

jine ki jo umang thi wo bhi nahin rahi

be-as kar gaya koi har aas chhin kar

tum ne bujhai bajti hui bansiyon ki kuk

mujh se mere wajud ke taT tas chhin kar

kuchh to bata main tera gunahgar kab hua

kyun aatma ko bhrashT kiya mas chhin kar

matam-kunan hain sare asatiri waqiye

tanha qalam ko kar diya qirtas chhin kar

rawan ne phir juda kiya sita ko ram se

phir kalpana bujhai gai qayas chhin kar

sanjog jug janam ke hue qata alwidaa

ban ko jalaya aag ne bu bas chhin kar