chhup ke usne jo KHud-numai ki

chhup ke us ne jo ḳhud-numā.ī kī

intihā thī ye dilrubā.ī kī

mā.il-e-ġhamza hai vo chashm-e-siyāh

ab nahīñ ḳhair pārsā.ī kī

ham se kyūñkar vo āstāna chhuTe

muddatoñ jis pe jab.ha-sā.ī kī

dil ne barsoñ ba-justujū-e-kamāl

kūcha-e-ishq meñ gadā.ī kī

daam se un ke chhūTnā to kahāñ

yaañ havas bhī nahīñ rihā.ī kī

kyā kiyā ye ki ahl-e-shauq ke saath

tū ne kī bhī to bevafā.ī kī

ho ke nādim vo baiThe haiñ ḳhāmosh

sulh meñ shaan hai laḌā.ī kī

us taġhāful-shi.ār se 'hasrat'

ham meñ tāqat nahīñ judā.ī kī

chhup ke us ne jo KHud-numai ki

intiha thi ye dilrubai ki

mail-e-ghamza hai wo chashm-e-siyah

ab nahin KHair parsai ki

hum se kyunkar wo aastana chhuTe

muddaton jis pe jabha-sai ki

dil ne barson ba-justuju-e-kamal

kucha-e-ishq mein gadai ki

dam se un ke chhuTna to kahan

yan hawas bhi nahin rihai ki

kya kiya ye ki ahl-e-shauq ke sath

tu ne ki bhi to bewafai ki

ho ke nadim wo baiThe hain KHamosh

sulh mein shan hai laDai ki

us taghaful-shiar se 'hasrat'

hum mein taqat nahin judai ki