chupke chupke yaad ye kis ki aai hai

chupke chupke yaad ye kis kī aa.ī hai

dard meñ Duubī aaj mirī tanhā.ī hai

jis ne kiyā barbād hamāre gulshan ko

ġhair nahīñ hai vo apnā hī bhaa.ī hai

kaun hai apnā kaun parāyā kaisī vafā

sach kahne meñ apnī hī rusvā.ī hai

apnī ġharaz ke bande haiñ sab log yahāñ

sab kā maqsad jag meñ ḳhud-ārā.ī hai

kis kī huī hai jo terī merī hogī

ye duniyā to yug yug se harjā.ī hai

lauT ke pīchhe jaanā bhī hai nā-mumkin

aage dushman pīchhe gahrī khaa.ī hai

ūñchī ūñchī bāteñ kyoñ kartā hai 'majīd'

sastī shohrat kā tū bhī shaidā.ī hai

chupke chupke yaad ye kis ki aai hai

dard mein Dubi aaj meri tanhai hai

jis ne kiya barbaad hamare gulshan ko

ghair nahin hai wo apna hi bhai hai

kaun hai apna kaun paraya kaisi wafa

sach kahne mein apni hi ruswai hai

apni gharaz ke bande hain sab log yahan

sab ka maqsad jag mein KHud-arai hai

kis ki hui hai jo teri meri hogi

ye duniya to yug yug se harjai hai

lauT ke pichhe jaana bhi hai na-mumkin

aage dushman pichhe gahri khai hai

unchi unchi baaten kyon karta hai 'majid'

sasti shohrat ka tu bhi shaidai hai