dana-e-gham na mahram-e-raaz-e-hayat hum

dānā-e-ġham na mahram-e-rāz-e-hayāt ham

dhaḌkā rahe haiñ phir bhī dil-e-kā.enāt ham

haañ ik nigāh-e-lutf ke haqdār the zarūr

maanā ki the na qābil-e-sad-iltifāt ham

bīm-e-ḳhizāñ se kis ko mafar thā magar nasīm

karte rahe guloñ se nikharne kī baat ham

ai sham.a dilbarī tirī mahfil se bār-hā

le kar uThe haiñ soz-e-ġham-e-kā.enāt ham

DhūñDā kiye haiñ rāh-e-havas rah-ravān-e-shauq

dekhā kiye haiñ laġhzish-e-pā-e-sabāt ham

un ke ġhamoñ kā haa.e sahārā na pūchhiye

kuchh pā ga.e haiñ apne ġhamoñ se najāt ham

dana-e-gham na mahram-e-raaz-e-hayat hum

dhaDka rahe hain phir bhi dil-e-kaenat hum

han ek nigah-e-lutf ke haqdar the zarur

mana ki the na qabil-e-sad-iltifat hum

bim-e-KHizan se kis ko mafar tha magar nasim

karte rahe gulon se nikharne ki baat hum

ai shama dilbari teri mahfil se bar-ha

le kar uThe hain soz-e-gham-e-kaenat hum

DhunDa kiye hain rah-e-hawas rah-rawan-e-shauq

dekha kiye hain laghzish-e-pa-e-sabaat hum

un ke ghamon ka hae sahaara na puchhiye

kuchh pa gae hain apne ghamon se najat hum