daba paDa hai kahin dasht mein KHazana mera

dabā paḌā hai kahīñ dasht meñ ḳhazāna mirā

tū kis talāsh meñ hai shahr meñ divāna mirā

tamām raat hai āñkhoñ se āñsuoñ kī kashīd

tamām raat khulā hai sharāb-ḳhāna mirā

ye mirī ruuh kā jhagḌā thā āsmāñ ke saath

bilā-qusūr badan ban gayā nishāna mirā

falak ke sar pe paḌe haiñ mirī zamīn ke paañv

mire sirhāne se ūñchā hai pā.itāna mirā

maiñ ek zaḳhm barābar zamīñ pe rahtā huuñ

vo kah rahe haiñ ye qabza hai ġhāsibāna mirā

to aao ahl-e-jahāñ is pe faisla kar leñ

makān saarā tumhārā darūn-e-ḳhāna mirā

ḳhud apne aap meñ hai saarī merī āmad-o-raft

kahīñ se aanā na ab hai kahīñ bhī jaanā mirā

kahāñ kā ishq havas tak bhī ho nahīñ saktī

yahī rahegā jo andāz mujrimāna mirā

bikhernī hai jise zulf us kā istiqbāl

vabāl-e-shahr se ḳhālī hai ek shāna mirā

maiñ ḳhuub faaqa na kartā to mar gayā hotā

mire ḳhilāf saf-ārā thā āb-o-dāna mirā

kabhī ḳhudā kabhī insān raah meñ haa.il

ḳhud apne aap se rishta bhī ġhā.ebāna mirā

kahīñ mire kisī lamhe se phir huī koī chuuk

phir aate aate kahīñ rah gayā zamāna mirā

tire ġhayāb kī ḳhidmat meñ saarā merā qusūr

vajūd phir bhī vahī ġhair-hāzirānā mirā

vo mere lafz ke donoñ suroñ se vāqif hai

kabhī bhī kaam na aayā koī bahāna mirā

daba paDa hai kahin dasht mein KHazana mera

tu kis talash mein hai shahr mein diwana mera

tamam raat hai aankhon se aansuon ki kashid

tamam raat khula hai sharab-KHana mera

ye meri ruh ka jhagDa tha aasman ke sath

bila-qusur badan ban gaya nishana mera

falak ke sar pe paDe hain meri zamin ke panw

mere sirhane se uncha hai paitana mera

main ek zaKHm barabar zamin pe rahta hun

wo kah rahe hain ye qabza hai ghasibana mera

to aao ahl-e-jahan is pe faisla kar len

makan sara tumhaara darun-e-KHana mera

KHud apne aap mein hai sari meri aamad-o-raft

kahin se aana na ab hai kahin bhi jaana mera

kahan ka ishq hawas tak bhi ho nahin sakti

yahi rahega jo andaz mujrimana mera

bikherni hai jise zulf us ka istiqbaal

wabaal-e-shahr se KHali hai ek shana mera

main KHub faqa na karta to mar gaya hota

mere KHilaf saf-ara tha aab-o-dana mera

kabhi KHuda kabhi insan rah mein hail

KHud apne aap se rishta bhi ghaebana mera

kahin mere kisi lamhe se phir hui koi chuk

phir aate aate kahin rah gaya zamana mera

tere ghayab ki KHidmat mein sara mera qusur

wajud phir bhi wahi ghair-hazirana mera

wo mere lafz ke donon suron se waqif hai

kabhi bhi kaam na aaya koi bahana mera