dafatan dil mein kisi yaad ne li angDai

daf.atan dil meñ kisī yaad ne lī añgḌā.ī

is ḳharābe meñ ye dīvār kahāñ se aa.ī

aaj khulne hī ko thā dard-e-mohabbat kā bharam

vo to kahiye ki achānak hī tirī yaad aa.ī

bas yuuñ hī dil ko tavaqqo sī hai tujh se varna

jāntā huuñ ki muqaddar hai mirā tanhā.ī

nashsha-e-talḳhī-e-ayyām utartā hī nahīñ

terī nazroñ ne gulābī to bahut chhalkā.ī

yuuñ to har shaḳhs akelā hai bharī duniyā meñ

phir bhī har dil ke muqaddar meñ nahīñ tanhā.ī

Dūbte chāñd pe roī haiñ hazāroñ āñkheñ

maiñ to royā bhī nahīñ tum ko hañsī kyuuñ aa.ī

raat bhar jāgte rahte ho bhalā kyuuñ 'nāsir'

tum ne ye daulat-e-bedār kahāñ se paa.ī

dafatan dil mein kisi yaad ne li angDai

is KHarabe mein ye diwar kahan se aai

aaj khulne hi ko tha dard-e-mohabbat ka bharam

wo to kahiye ki achanak hi teri yaad aai

bas yun hi dil ko tawaqqo si hai tujh se warna

jaanta hun ki muqaddar hai mera tanhai

nashsha-e-talKHi-e-ayyam utarta hi nahin

teri nazron ne gulabi to bahut chhalkai

yun to har shaKHs akela hai bhari duniya mein

phir bhi har dil ke muqaddar mein nahin tanhai

Dubte chand pe roi hain hazaron aankhen

main to roya bhi nahin tum ko hansi kyun aai

raat bhar jagte rahte ho bhala kyun 'nasir'

tum ne ye daulat-e-bedar kahan se pai