dam-e-visal ye hasrat rahi rahi na rahi

dam-e-visāl ye hasrat rahī rahī na rahī

jamāl-e-yār kī hairat rahī rahī na rahī

use ye naaz thā ḳhud par ki zindagī hai mirī

so zindagī kī haqīqat rahī rahī na rahī

kamāl kar ke dikhāyā hai merī āñkhoñ ne

ab in meñ pahlī sī vahshat rahī rahī na rahī

lagā huā hai zamāna isī tajassus meñ

vo mere pahlū kī zīnat rahī rahī na rahī

koī bhī rabt magar dā.imī nahīñ hotā

kisī ke haq meñ tabī.at rahī rahī na rahī

hazāroñ yaar hazāroñ hī chāhne vaale

magar nasīb meñ ḳhalvat rahī rahī na rahī

hai kaisā zor kā tūfāñ bacheñ bacheñ na bacheñ

rahī rahī na rahī chhat rahī rahī na rahī

yuuñ apne jazb meñ gum ho gayā hai ab 'sānī'

sharāb-o-mai kī zarūrat rahī rahī na rahī

dam-e-visal ye hasrat rahi rahi na rahi

jamal-e-yar ki hairat rahi rahi na rahi

use ye naz tha KHud par ki zindagi hai meri

so zindagi ki haqiqat rahi rahi na rahi

kamal kar ke dikhaya hai meri aankhon ne

ab in mein pahli si wahshat rahi rahi na rahi

laga hua hai zamana isi tajassus mein

wo mere pahlu ki zinat rahi rahi na rahi

koi bhi rabt magar daimi nahin hota

kisi ke haq mein tabiat rahi rahi na rahi

hazaron yar hazaron hi chahne wale

magar nasib mein KHalwat rahi rahi na rahi

hai kaisa zor ka tufan bachen bachen na bachen

rahi rahi na rahi chhat rahi rahi na rahi

yun apne jazb mein gum ho gaya hai ab 'sani'

sharab-o-mai ki zarurat rahi rahi na rahi