dar-parda jafaon ko agar jaan gae hum

dar-parda jafāoñ ko agar jaan ga.e ham

tum ye na samajhnā ki burā maan ga.e ham

ab aur hī aalam hai jahāñ kā dil-e-nādāñ

ab hosh meñ aa.e to mirī jaan ga.e ham

palkoñ pe larazte hue taare se ye aañsū

ai husn-e-pashīmāñ tire qurbān ga.e ham

ham aur tire husn-e-taġhāful se bigaḌte

jab tū ne kahā maan ga.e maan ga.e ham

badlā hai magar bhes ġham-e-ishq kā tū ne

bas ai ġham-e-daurāñ tujhe pahchān ga.e ham

hai 'saif' bas itnā hī to afsāna-e-hastī

aa.e the pareshān pareshān ga.e ham

dar-parda jafaon ko agar jaan gae hum

tum ye na samajhna ki bura man gae hum

ab aur hi aalam hai jahan ka dil-e-nadan

ab hosh mein aae to meri jaan gae hum

palkon pe larazte hue tare se ye aansu

ai husn-e-pashiman tere qurban gae hum

hum aur tere husn-e-taghaful se bigaDte

jab tu ne kaha man gae man gae hum

badla hai magar bhes gham-e-ishq ka tu ne

bas ai gham-e-dauran tujhe pahchan gae hum

hai 'saif' bas itna hi to afsana-e-hasti

aae the pareshan pareshan gae hum