dard le jata ziyan le jata

dard le jaatā ziyāñ le jaatā

kaun ye tohfa-e-jāñ le jaatā

maiñ ki larzāñ thā jhukī shāḳhoñ meñ

mujh ko jhoñkā bhī kahāñ le jaatā

mujh ko kyoñ Dhāñp diyā shāyad maiñ

jal na saktā to dhuāñ le jaatā

itnā arzāñ hai ye bāzār-e-vafā

maiñ kahāñ jins-e-girāñ le jaatā

terā kamra hai magar tū hī nahīñ

tū hī aatā ye samāñ le jaatā

tū mirā dost hai ai kaash ki tū

aah de jaatā fuġhāñ le jaatā

itnā pindār to hotā mujh meñ

tū makīñ thā maiñ makāñ le jaatā

maiñ to us kā hī thā iqbāl 'matīn'

us kā jī chāhe jahāñ le jaatā

dard le jata ziyan le jata

kaun ye tohfa-e-jaan le jata

main ki larzan tha jhuki shaKHon mein

mujh ko jhonka bhi kahan le jata

mujh ko kyon Dhanp diya shayad main

jal na sakta to dhuan le jata

itna arzan hai ye bazar-e-wafa

main kahan jins-e-giran le jata

tera kamra hai magar tu hi nahin

tu hi aata ye saman le jata

tu mera dost hai ai kash ki tu

aah de jata fughan le jata

itna pindar to hota mujh mein

tu makin tha main makan le jata

main to us ka hi tha iqbaal 'matin'

us ka ji chahe jahan le jata