dariya ki tishnagi mein insan ki bebasi mein

dariyā kī tishnagī meñ insāñ kī bebasī meñ

paayā tujhe hai yārab dil kī shikastagī meñ

terī kamī satā.e har ġham meñ har ḳhushī meñ

rahtā hai aaj bhī tū is aañkh kī namī meñ

shāyad kabhī paḌe hoñ un par bhī paañv tere

chūmā hai pattharoñ ko ham ne tirī galī meñ

āñkheñ vo tere jaisī tujh sā hasīn chehrā

ham DhūñDte rahe haiñ tujh ko hī har kisī meñ

mujh par khulā nahīñ hai ye rāz-e-hast merā

kahne ko ḳhaak chhānī hai dasht-e-āgahī meñ

roiiñ bujhā ke mujh ko phir ġham-zada havā.eñ

maiñ sham.a-e-āḳhirī thī is shab kī tīrgī meñ

uktā ga.ī huuñ shāyad patthar kī mūratoñ se

lagtā nahīñ hai ab ye dil bhī sanam-garī meñ

qaid-e-hayāt par dil dīvāna-vār nāche

masrūr hai ki aayā terī supurdagī meñ

kāfir jo kah rahe the sab jānte the 'jīnā'

peshānī naqsh-e-pā pe rakkhī thī be-ḳhudī meñ

dariya ki tishnagi mein insan ki bebasi mein

paya tujhe hai yarab dil ki shikastagi mein

teri kami satae har gham mein har KHushi mein

rahta hai aaj bhi tu is aankh ki nami mein

shayad kabhi paDe hon un par bhi panw tere

chuma hai pattharon ko hum ne teri gali mein

aankhen wo tere jaisi tujh sa hasin chehra

hum DhunDte rahe hain tujh ko hi har kisi mein

mujh par khula nahin hai ye raaz-e-hast mera

kahne ko KHak chhani hai dasht-e-agahi mein

roin bujha ke mujh ko phir gham-zada hawaen

main shama-e-aKHiri thi is shab ki tirgi mein

ukta gai hun shayad patthar ki muraton se

lagta nahin hai ab ye dil bhi sanam-gari mein

qaid-e-hayat par dil diwana-war nache

masrur hai ki aaya teri supurdagi mein

kafir jo kah rahe the sab jaante the 'jina'

peshani naqsh-e-pa pe rakkhi thi be-KHudi mein