دشت جلال پھیلا ہے اور بے عصا ہوں میں

دشت جلال پھیلا ہے اور بے عصا ہوں میں

حیرت زدہ ہوں زندہ ہوں کیا معجزہ ہوں میں

میرے خدائے عشق کہاں ہے کلام کر

رسوائیوں کے طور پہ کب سے کھڑا ہوں میں

گلیاں سمٹ کے مجھ میں جلانے لگیں دیے

کس لو میں گم ہوں کس کی طرف جا رہا ہوں میں

اب کس سفر پہ جاؤں بتا نازنین وہم

اپنی قبائے روح بھی تہہ کر چکا ہوں میں

باشندگان قریۂ دل صف بہ صف رہیں

اک کائناتی غم کی گرہ کھولتا ہوں میں

میرا پتہ ٹھکانہ کہاں جز مرے سوا

میری تلاش کیا کہ ابھی گم شدہ ہوں میں