dast-e-qatil ko mohabbat ka sabab karte hain

dast-e-qātil ko mohabbat kā sabab karte haiñ

ham diye haiñ jo havāoñ kā adab karte haiñ

kis aziyyat se guzarte haiñ kabhī soch ke dekh

log jo niiñd nahīñ maut talab karte haiñ

ḳhvāb mahbūb dharam naam sabhī kuchh kho kar

ḳhud-kushī gar nahīñ karte to ġhazab karte haiñ

yuuñ to vahshat hai yā ġhussa hai hamārī pahchān

haañ magar pyaar bahut karte haiñ jab karte haiñ

aah ko qahqaha karne kā hunar jānte haiñ

mātamī rang ko ham rang-e-tarab karte haiñ

ham se logoñ ko hī majzūb kahā jaatā hai

yaar ke naam ko jo nām-o-nasab karte haiñ

dast-e-qatil ko mohabbat ka sabab karte hain

hum diye hain jo hawaon ka adab karte hain

kis aziyyat se guzarte hain kabhi soch ke dekh

log jo nind nahin maut talab karte hain

KHwab mahbub dharam nam sabhi kuchh kho kar

KHud-kushi gar nahin karte to ghazab karte hain

yun to wahshat hai ya ghussa hai hamari pahchan

han magar pyar bahut karte hain jab karte hain

aah ko qahqaha karne ka hunar jaante hain

matami rang ko hum rang-e-tarab karte hain

hum se logon ko hi majzub kaha jata hai

yar ke nam ko jo nam-o-nasab karte hain